'n GEBED VIR PELAGIESE VIS

Heer, hierby vra ons dat u die trotste pelagiese vloot ter wêreld sal seën met 'n oorvloed pelagiese vis gedurende die 2026 seisoen. Hou asseblief u veilige hand oor die vloot, vissermanne, fabriekspersoneel en die wat die kosmandjies voorberei ten einde arbeid te kan verrig. Doen asseblief iets hier onder die vissermanne wat vir U koningkryk 'n getuienis sal wees. Amen.

      

 

DIE TROTSTE VISSERSVLOOT TER        WêRELD NEEM AFSKEID VAN 'n            LEGENDARIESE SKIPPER EN                 VLOOTBESTUURDER

 

DIE SKUITE HOU                      VERJAARSDAG! Vir die maand van April het ons 21 skuit verjaarsdae om te vier. Ook maar goed elke skuit hou nie fisies 'n partytjie nie, so nie sou ons amper elke dag van die maand met 'n babalas moes opstaan...               (Die skuite se onderskeie ouderdomme word                         hieronder aangetoon in hakies.)                                                Atlantic Rose (3)                                                                                                     Tyler's Tide (5)                                                             Donna Mari (8)                                                      Deolinda (13)                                                                               Tiyalina (15)                                                 Silver Spirit (18)                                                             Oom Arthur (22)                                                 Avro Warrior (26)                                                Vuna Christelle (27)                                           Compass Challenger (43)                                                        Junior (45)                                                      Baldur Arna (48)                                                         Hesko (50)                                                       Nossob (51)                                                 Soos dinge tans daarna uitsien, gaan ons                      maar eenvoudig moet aanvaar dat hierdie                          haar laaste verjaarsdag gaan wees...                                     Excalibur (56)                                                        Aquilla (58)                                                Boston Wayferer (61)                                    Op die presiese oomblik toe hierdie foto geneem was, het         Willem Buckle nog reg langs my gestaan, oomblikke soos                  hierdie wat ek vir altyd saam met my sal dra...                         Ivy Doreen (66)                                                      Kariba (66)

 

"CREATIVITY" WORD                       TER WATER GELAAT Afgeneem hieronder op 4 Februarie 2026 word "Creativity", die nuutste toevoeging tot die Suid-Afrikaanse pelagiese vloot ter water gelaat in Sandy Point hawe. Vir die eerste keer in baie jare het ons weer 'n nuwe skuit in die water gesit met 'n mooi betekenisvolle naam, wat mens baie herhinner aan die Skotse visserman families se mooi skuitname byvoorbeeld "Fruitful Bow" ,"Prosperity", "Research", "Alacrity", "Accord", "Lunar Bow", "Tranquility", "Reliance", "Defiant", "Prolific", "Venturous"...en nou ons eie "Creativity", wat spog met 'n naam enig in haar soort.                                                           Beloer ek die bootbou-skedules vir die res van die jaar, dan wil dit my voorkom asof die De Wet-familie aan nog 'n nuwe skuit gekoppel gaan word...Trawler Heritage het vroeër vanjaar melding gemaak van 'n "kultuurskok" wat die pelagiese bedryf gaan tref gedurende 2026, en al loer die nuuskieriges deur die skrefies by Sachal en Tallie Marine gaan hulle in elk geval niks sien nie, want dit kom vanuit 'n heel ander rigting...

 

"NANJA" WORD WAL                            TOE GEJAAG Afgeneem hieronder op 3 Februarie 2026 in Club Mykonos word "Nanja" uit die water gelig vir 'n romp skrop asook haar jaarlikse "survey". Dis nie aldag dat mens 'n Sachal chukkie in hierdie deel van die wêreld sal aantref nie, maar nou ja, wat kan 'n man doen as die visbedryf nie "welkom" geag word elders by ander fasiliteite langs hierdie deel van die kuslyn nie.                           Moes ook maar mooi korrel en druk om seker te maak dat die crew nie onnodig blootgestel word aan die "maritieme pornografie" in die agtergrond nie - daai goedters met die lang maste. Met hierdie bank seiljagte wat hulle in hierdie hawe-tjie in gedruk het, kan jou skuit maklik siektes opdoen...

 

"WESTERN STAR" VERNIETIG                                DEUR VLAMME Op presies dieselfde oomblik dat die visbedryf juig oor twee nuwe skuite, het nog 'n vlamme-tragedie afgespeel langs die ooskus. Afgeneem hieronder op 2 Februarie 2026 woed 'n brand aanboord van die tjokka skuit "Western Star", afkomstig van St.Francisbaai. Die "Western Star" is 'n 40-voet Sachal bousel wat oorspronklik deel gevorm het van Paternoster Visserye se kreefvloot terug in tyd.

 

TALLIE MARINE STAAN REG                      MET NUUTSTE BOUSEL                    GOOD-LUCK "RHOGAYA! Afgeneem hieronder op 30 Januarie 2026 is die nuutste toevoeging tot die Suid-Afrikaanse langlyn sektor, die 83-voet "Rhogaya" wat gereed staan by die Tallie Marine skeepswerf. Die "Rhogaya" se ter water lating is skeduleer vir 2 Februarie 2026.                  Afgeneem hieronder op 2 Februarie 2026 langs die Tallie Marine kaai in Sandy Point hawe lê "Rhogaya" nadat die skuit vroeër die dag ter water gelaat is.

 

NUUTSTE VIDEO OP DIE                  KANAAL VAN TRAWLKAMPIOENE                               IETS VAN ALLES                                JANUARIE 2026                               In die video hieronder wat verfilm is by Gansbaai en Sandy Point gedurende die maand van Januarie 2026 word talle pelagiese skuite uitgebeeld waaronder "Wafra", "Aranos", "Oceana Concorde", "Southern Belle" en "Char-Neil", terwyl "Borderer" die een skep sardyn op 'n volgende droog maak. Die twee nuwelinge in die Suid-Afrikaanse vloot naamlik "Creativity" en "Rhogoya" maak ook vir die eerste keer hul video debut hier op die kanaal van trawlkampioene.

 

SACHAL STAAN REG OM                                LOS TE GOOI!                                 GOOD-LUCK "CREATIVITY"! Afgeneem hieronder op 26 Januarie 2026 by die Sachal skeepswerf in Vredenburg staan die jongste toevoeging tot die Suid-Afrikaanse pelagiese bedryf, genaamd "Creativity". Geskoei op die boulyne van haar voorganger die "Stormgans", is daar heelwat nuwe toevoegings sowel as kreatiwiteit aan die dag gelê met die vervaardiging van hierdie prag skuit oor die afgelope 10 maande. Kenmerkend op die bakboord boeg area is die anker se "hawser" pyp wat na dekades weer 'n "come back" maak. Terug in die laat 1960's was dit suksesvol aangewend deur beide Louw & Halvorsen asook Maritime Industries. Met die jare heen het die gebruik van die "hawsers" egter in ongebruik verval en is die laaste een nog gedeeltelik te siene op "Gregory Justin", alhoewel dit vandag bedek is onder tien lae glasvesel. Soos gebruiklik sal die "Creativity" padlands vervoer word na Sandy Point hawe vir die ter water lating wat voorlopig geskeduleer is vir 30 Januarie 2026, gegewe die heersende weersomstandighede en die gepaardgaande gety by aankoms in Sandy Point hawe.                        Afgeneem hieronder is die "Creativity" staande gemaak op 'n nuut ontwerpte "cradle" wat bo-op die vragmotor se sleepbak gemonteer sal word vir die moeisame tog see toe.                              Afgeneem hieronder op 2 Februarie 2026 vertrek "Creativity" padlangs oor 'n afstand van 23km vanaf Vredenburg na Sandy Point hawe.

 

"OCEANA RUBY" WORD HERDOOP                            TOT "TENDAI" Afgeneem hieronder op 26 Januarie 2026 op Laaiplek is die voormalige "Oceana Ruby" wat voortaan bekend sal staan as "Tendai", wat in Shona-taal beteken "danksegging aan God". En daarmee neem ons afskeid van nog 'n "Oceana" skuitnaam waarmee ons groot geword het, en waarskynlik nooit weer op 'n ander skuit sal pryk nie - en nog 'n klein stukkie van Houtbaai se geskiedenis verdwyn onder ons oë in die niet...

 

DIE SKUIT-TOILET UPDATE Afgeneem hieronder op 26 Januarie 2026 op Laaiplek is hoe "Nossob" se whale back area tans daarna uitsien vanwaar die skuit tans gesloop word langs die kaai. Nou soos wat die skuit tans daarna uitsien is alle werkende toerusting alreeds van die skuit verwyder - daar is niks meer oor van waarde nie - rêrig? En hiermee gaan Trawler Heritage vir die soveelste keer vir die crew bewys dat die skuit toilet die sterkste voorwerp is op enige skuit wat selfs die aanslag van tien pond hammers en kettingsae kan oorleef...kyk gou wat staan daar in die rooi omkringde sirkel...die skuit se toilet!                                                        "NOSSOB" SE SKUIT TOILET                                                  Alles op die skuit is faktap geslaan                    (aai dammit daar vloek ek nou) maar die skuit toilet                                            is nog staande...

 

"BORDERER" SJOR IN                        DIE SARDYNE Afgeneem hieronder op 24 Januarie 2026 is "Borderer" besig om haar eerste skep sardyn vir die 2026 pelagiese seisoen in te pomp, skaars twee myl se loop buitekant Gansbaai se hawemuur.

                    DIE 2025 AGTERSKOT  
           OPDATERING NOU  BESKIKBAAR

Môre-môre, ek vertrou dit gaan nog goed met die crew. Net soos die hoofopskrif aandui het  Trawler Heritage seker gemaak dat die trotste vissersvloot ter wêreld sy status behou, nadat die opdaterings oor die afgelope maande baie skaars geraak het weens dummies, bababottels, vuil doeke en 'n groot pelagiese projek wat meeste van my tyd opgeneem het. En nee, Trawler Heritage was nie betrokke by die bou van Suid-Oranje se nuwe vismeelaanleg nie, en vir diegene wat deur die skrefies wil loer by Tallie Marine en Sachal, julle kyk in die verkeerde rigting! Daar is weer 'n kultuurskok oppad in ons visbedryf, die grootste een sedert 2007 toe die uitgesterwe "gans-name" een vir een uit die dode opgeroep is, maar meer daarvan in 'n latere uitgawe - laat ons maar eerder nie nou 'n trop slapende robbe by Kaap Kruis wakker maak nie...So klompie maande gelede vat ons die pad hier af Kaap toe vir die jaarlikse "Blessing of the Fleet" om die skuite te laat seën vir goeie vangste en vir die vissermanne se veiligheid ter see. Ek was vooraf gewaarsku, maar kom laat ek sommer terselfde tyd ook ander waarsku wat die "Blessing of the Fleet" nog gaan bywoon in die toekoms...Daardie "heilige water" waarmee die katolieke priester die skuite mee seën...bly weg van dit af! Moenie dat dit net eers per ongeluk op jou of op jou vrou spat nie - dis moeilikheid! Daardie water maak mens vrugbaarder as 'n Grabou-appel! Die gevolg? Die eerste baba-dogtertjie in 36 jaar in die familie maak haar verskyning ('n klein wonderwerk op sy eie). Volgens die tradisie waar ons die skuite na die kinders vernoem, het Trawler Heritage die gewoonte op sy kop gekeer en hierdie keer die kind na 'n skuit vernoem, en het die voorreg vir "Sette Mari" te beurt geval. Die Walvisbaaiers sal vir jou sê daar was so 'n skuit, die Onderbaaiers sal vir jou sê daar is so 'n skuit, en die vrou agter die toonbank by Binnelandse Sake het my vraend aangekyk want mens kon sommer sien sy het nie mooi geweet hoe mens hierdie kind se naam uitspreek nie!

In die jongste uitgawe spoel die vissies behoorlik van die dek af, die visputte is geblok en ons hardloop ooplyne oralste langs die kuslyn op en af, van Walvisbaai tot onder in Port Elizabeth, Bobaai, Onderbaai, Voorbaai en Agterbaai deur en gly om elke puntjie wat in ons pad kom. Met meer as 800 fotos en 'n musiekvideo vir die tydperk 25 Februarie 2025 tot 1 Januarie 2026 word die room van die Suid-Afrikaanse visbedryf uitgebeeld. Trawler Heritage wil geensins "brag" met hierdie skep nie, maar gedurende 2025 is 'n totaal van 1622 fotos geplaas wat die trots uitbeeld van die Suid-Afrikaanse visbedryf, en sover dit Trawler Heritage se kennis strek is daar geen ander maritieme publikasie, nog enige ander sosiale media blaaie wat met hierdie getalle kon mee ding nie, nie in S.A. ook nie elders in die wêreld nie.

Die 2025 pelagiese seisoen is een wat nie lank onthou sal word nie, ons het skuite gesink en ons het skuite af geskryf en inteendeel, was dit nie vir die oorvloed Rooi-oê wat die vloot aan die gang gehou het, sou dinge andersins maar baie sleg gelyk het. Vir drie seisoene agtereenvolgens het die migrende skole Ansjovis die land "mis geswem" en waar presies hulle, hulself nou bevind kan mens net raai. Dalk, moontlik, miskien diep in die suide kruip hulle weg, waar selfs die mees tegnologies gevorderdste pelagiese vloot in Afrika hulle nie kan bykom nie. Gegewe die verwagte lewensduur van 'n Ansjovis moes die eerste van daardie drie "vermiste" generasies Ansjovissies alreeds afgesterf het. Een ding is wel duidelik, en dit is dat ons 'n sewe maerjare siklus betree het. Diegene wat dit nou sou waag om 'n nuwe skuit in die water te sit, doen dit op eie risiko, so nie gaan die bankpaaiement jou slapelose nagte besorg. Gedurende die 2025 pelagiese seisoen was daar selfs 'n verbod op die vang van sardyne geplaas, en hierdie keer nie weens 'n oormaat klein-sardyntjie nie, maar weens trae verbruikersaanvraag en 'n algehele oorproduksie van ingemaakte sardyne. Die groot sondebok hierso is die ingevoerde sardyne wat op die Suid-Afrikaanse mark verkoop word onder huishoudelike handelsmerke. Kom ons wees eerlik met mekaar, en daarby saam moet ek erken dat Trawler Heritage self 'n persoon is wat feitlik daagliks 'n blik sardyne verorber, sommer net-so met 'n vurk uit blik! Die probleem is dat verbruikers hul aptyt verloor het vir ingemaakte sardyne weens die "slegte" of sal ons sê die ongewone smaak en tekstuur daarvan - selfs die kat trek sy neus daarvoor op en stap weg. Sedertdien Langeberg Ko-op sy deure gesluit het, is die smaak van tamatie purië net nie meer dieselfde nie, nadat die inmaakfabrieke genoop was om van alternatiewe verskaffers gebruik te maak. Die sardynbron word al vir dekades lank jaloers beskerm as 'n bron van protiëne vir menslike gebruik, en tog wil dit voorkom asof die sardynbron stadig maar seker weer soos onkruid aanteel gegewe die plate en plate vis wat op die sonars opgemerk word, maar netso ongehinderd agter gelaat moet word.

So gepraat van sardyn, ek lees die anderdag 'n historiese artikel van die Britse sleeptreiler genaamd "Kirkella". (en meteens sit die Walvisbaaiers nou kierts regop, want hulle onthou nog daai naam). Die "Kirkella" het gedurende 1967 'n stokvis ekspedisie onderneem en vanaf Hull in Engeland na Walvisbaai gevaar vanwaar die skuit (freezer stern trawler) werksaam was in die gebiedswaters van Suid-Wes Afrika. Die hele vangs is in die "Kirkella" se ruime gevries en is saam terug Engeland toe waar die vangs op die Britse vismarkte verkoop was. Dis egter die inhoud van die vangs wat Trawler Heritage se aandag getrek het, wat ingesluit het stokvis, monk, wit-steenbras, kabeljou, snoek en glo dit of nie....sardyne! Mense, en daar is nou finaal die bewyse dat terug in tyd dit nie saak gemaak het hoeveel wette en regulasies daar deur die destydse S.W.A Administrasie deurgevoer was nie, hulle kon eenvoudig net nie die sardyn bron binne Suid-Wes Afrika se gebiedswaters genoegsaam beskerm het teen buitelandse vissersvlote wat ongesteurd die bron kon plunder wat uiteindelik gelei het tot die totale ineenstorting daarvan nie.

                                             "Kirkella"
               

Die 2025 visseisoen sal egter onthou word vir alles wat geel is - geelkop sardyne, geelstert en geelvin tuna. Van geelbek het Trawler Heritage nie veel van gewaar nie. Die tuna manne het 'n uitstekende seisoen tot dusver beleef, en by tye het dit eerder gelyk asof die manne binne-in 'n akwariumtenk vol geelvin tuna vis gevang het. Dat die tuna manne tans in die geld baljaar is nie altemit nie. Interessant om op te merk dat die tuna manne wat huidiglik op die see is, slegs diegene is wat bootlenings het om terug te betaal, en reg ook so, werk hard en betaal julle skuite af voordat ook julle maerjare aanbreek.

Gedurende September-2025 lees ek van 'n persoon (binne die visbedryf) waarin die persoon sy ontevredenheid uitspreek dat die pelagiese fabriek waarby hy betrokke is alreeds produksie gestaak het gedurende daardie maand. En ek dink by myself, September-maand? Ou maat, jy is nog bevoorreg, terug in tyd het die pelagiese seisoen klokslag op 31 Augustus gesluit - met geen toegewings daarby nie, sodat die pelagiese bronne genoegsame tyd kon hê om hul eiertjies te gaan lê het. Vir 'n paar gelukkiges kon hulle weer Oktober-maand see toe gaan om te deel in die jaarlikse Makriel-bonanza, en daarna gedurende November en Desember maande het die pelagiese vissermanne gaan kreef vang. Maar, dit is ook al lankal iets van die verlede. Die makriel bron het ons immers ook uitgeroei, en dis veral die Russiese fabriekskepe wat binne ons gebiedswaters gewerk het, wat ook 'n groot aandeel daarin gehad het, gegewe dat dit nog die dae was van die oranje-blanje-blou. Laat mens nogal bietjie wonder nê?!


Die gebrekkige kennis rakende die huidige stand van sake sowel as die historiese agtergrond van die Suid-Afrikaanse visbedryf onder die algemene publiek (die 101.9% groep mense wat nie weet wat op die see aangaan nie) gaan Trawler Heritage se verstand te bowe. Dis die jaar 2026 en in 'n artikel wat slegs 'n dag of twee gelede gepubliseer word in die Daily Maverick, word daar met smaak gekorrespondeer aangaande die twee fabriekskepe van destyds by name "Suiderkruis" en "Willem Barendz" (Daily Maverick, maak net seker want julle spelling van die skepe se name is nie korrek nie). In die artikel word die waarheid verdraai dat beide skepe elk met 'n "lang net" toegerus was, kompleet met vriesgeriewe vir die vangste - Watse nonsens skryf die mense! In dieselfde artikel, is dit weer die ou afgesaagde storie van Chinese vistreilers wat tydens daglig net buitekant die 200-myl eksklusiewe sone lê, en dan tydens die nagtelike ure ons gebiedswaters binne dring en hul nette kom sleep tot teenaan ons kuslyn. Hoe de donner?! (verskoon my taal). Hoe doen mens dit, asseblief verduidelik dit vir my. Teen 'n gemiddelde spoed van 10 knope neem dit jou 'n dag, 'n nag en weer 'n halwe-dag net om die Suid-Afrikaanse kuslyn te bereik. Dan moet jy nog vis soek, jy moet nette afgooi, optrek, volmaak en dan weer "vlug" uit Suid-Afrikaanse gebiedswaters, 'n dag, 'n nag en 'n halwe-dag se loop ver tot by die 200-myl sone. Sulke denkwyses maak mos eenvoudig net nie sin nie!

Op 15 Januarie 2026 word Pioneer Fishing se nuut opgegradeerde vismeelaanleg van R170 miljoen amptelik geopen by Sandy Point hawe. Dit is uitstekende nuus vir die Suid-Afrikaanse pelagiese bedryf dat vismaatskappye op hierdie dag en uur nog bereid is om hierdie somme geld te investeer in die bedryf, eerder dat die bedryf maar net aanploeter met bestaande infrastruktuur. Alles goed en wel, maar in my leeftyd het Trawler Heritage gesien dat dit maak nie saak of jy die nuutste en duurste tegnologie aanwend, of die beste produksievloeie toepas nie, dis daarbuite by die aflaaipompe wanneer die dinge begin skeefloop wat die hele produksiesiklus tot op sy knieë dwing. Aan die einde van die dag is die effektiewe aflaai van die skuite die maak of breek van enige visfabriek. Die aflaaiers meld aan vir hul skofte, vol gepomp van "Monster" en "Score", blykbaar om die energie vlakke en konsentrasie te verbeter, maar dis seker net 'n "rumour"? Gedurende die pelagiese seisoen is daar gemiddeld net 156 seegaande dae beskikbaar, nie elke dag lewer vis op nie, maar sodra die vis dik loop dan is dit net drie dae voordat jy hoor hulle (aflaaiers) is moeg. Aflaaiwerk is nie altyd die skoonste van werke nie. Sou abattoirs glasvensters gehad het, sou veel minder mense vleis geëet het as wat tans die geval is - visfabrieke is nie ver agter nie. Die skippers voer 'n verbete stryd om can-vis se persentasie benutting so hoog as moontlik te hou, en in die geval van industriële vis laai jy al minder af hoe langer jy lê en wag teen die kaai. Die aflaaiproses is in baie gevalle die enigste interaksie wat die vissermanne met die fabriek het - wat die fabriek met die vis maak is hulle saak. Die aflaaiproses benodig passie en toewyding teen 'n hoë werkstempo. So, wanneer daardie laaste 5 ton uit die hold gepomp word, vat solank die deck wash en spuit die dek af, dit hoef immers nie te blink nie, maar elke bietjie help. Wanneer die skowwe en die bloedwater oormatig begin opdam op die kaai, vat die pyp en spoel af die kaai - daai water is mos immers verniet, ons betaal nie daarvoor nie! Kry die skuite terug in die see so gou moontlik en aan die einde van die maand is die geldjies, die agterskotte en die bonusse daar tesame met 'n glimlag op elkeen se gesig - en dis hoe 'n mens moet vis vang!

                     Pioneer Fishing Vismeel Reduksie Scrubbers
      

En hiermee is dit eers weer tyd om te groet. Ek laat julle met een laaste gedagte van 'n persoon binne die visbedryf vir wie Trawler Heritage groot aansien het naamlik Tim Reddell, aangaande die huidige toestand van ons visbedyf - "it's about defending what we have and adding value". Die 2026 pelagiese seisoen is op hande en dis nou slegs oomblikke voordat die skuite begin dril en die hoeters lawaai. Tot 'n volgende keer, over!

 

IETS VAN ALLES                       JULIE '25 - JANUARIE '26                              Nog nooit tevore het Trawler Heritage 'n video geskep waarin daar soveel chaos, die totale vernietiging van kapitaal bates met gepaardgaande verlies aan inkomste uitgebeeld word soos in die video hieronder nie. Alhoewel die meeste beeldmateriaal Walvisbaai, Saldanhabaai en Gansbaai uitbeeld, herhinner die inhoud van hierdie video ons maar net weer aan die gevare van die see.

 

TALLIE MARINE LAAT NUUTSTE           PURSE SEINER TER WATER         GOOD-LUCK "FIGHTING LADY! Afgeneem hieronder op 17 Desember 2025 is die nuutste toevoeging tot die Suid-Afrikaanse pelagiese vloot, die 83-voet "Fighting Lady" wat gebou is deur Tallie Marine in Sandy Point hawe.

 

SACHAL LAAT NUUTSTE           TUNAPAAL SKUIT TER WATER         GOOD-LUCK "SANTA MARIA! Afgeneem hieronder op 12 Desember 2025 is die nuutste toevoeging tot die Suid-Afrikaanse tunapaal vloot, die 47-voet "Santa Maria" wat gebou is deur Sachal in Vredenburg. Die "Santa Maria" sal voortaan werksaam wees vanuit Houtbaai. Benewens tunapaal, sal die skuit ook ingerig word vir die vang van lewendige aas.

 

NUWE STOKVISTREILER                       VIR WALVISBAAI    GOOD-LUCK "ATLANTIC CHALLENGE! Afgeneem hieronder is die "Atlantic Challenge", die nuutste toevoeging tot die Namibiese stokvisvloot wat op 17 November 2025 in Walvisbaai gearriveer het tydens haar afleweringsvaart vanaf Skotland. Die "Atlantic Challenge" is 131-voet lank en is gedurende 1999 ter water gelaat.

 

NUUTSTE TOEVOEGING TOT              NAMIBIESE MIDDELWATERVLOOT                   GOOD-LUCK "AMELIA"! Afgeneem hieronder is die nuutste toevoeging tot die Namibiese middelwatervloot genaamd "Amelia" wat voorheen werksaam was in Marokko. Die "Amelia" is 223 voet lank, 39 voet breed en is gedurende 1978 ter water gelaat.                               Ons sal moet begin kop hou met die skuitname, dis                  nou "Amoria", "Amalia" en "Amelia"...

 

"OCEAN FRESH" SE                  SUSTERSKUIT TE KOOP 'n Mens mag nie begeer nie, maar kyk net watse skuit is tans in die mark verbonde aan Latvia se pelagiese visbedryf - een van "Ocean Fresh" se susterskuite! Vir diegene wat kennis het van "Ocean Fresh", sal saamstem dat hierdie kaliber skuite uiters geskik is vir die Suid-Afrikaanse pelagiese bedryf en kan net so aangewend word in plaaslike omstandighede sonder om te veel te torring aan die bestaande uitleg van die skuit. Wat hierdie skuit (gebou in 2003) nog meer geskik maak, is die feit dat sy aangedryf word deur 'n Caterpillar hoofmasjien en nie 'n Mitsubishi soos in "Ocean Fresh" se geval nie. Aai-aai, 'n man kan net droom daarvan om met so 'n skuit te kan werk - met hierdie skuite kan jy sjor in die vis dat net die wielhuisie nog uitsteek...

 

"JAMES ARCHER" GAAN AWOL      OP HAAR EIE TOT IN KAALDUINE Afgeneem hieronder vroeg gedurende Januarie 2026 lê "James Archer" nou uitgespoel by Kaalduine, aan die noordekant van Lambertsbaai. Iewerste in hierdie verhaal moes iemand so waar as wragtag met 'n oliebroek op die knieë uitgevang gewees het, want van so 'n bog storie het Trawler Heritage lanklaas van gehoor...Hoe op dees aarde breek 'n skuit los voor die ou skaalhuisie binne-in Lambertsbaai se hawe, dryf uit die hawe, eers af slip se kant toe, en dan weer skerp links sonder om 'n klip te slaan, en spoel uit by Kaalduine! Don't talk crap to me! Dalk eerder het iemand tot sy sinne gekom en besef die probleem op hande is veels te groot om te hanteer en die skuit by die hawe uitgehelp en gehoop dit gaan self die probleem oplos? Dis nou maar een van daardie eg klassieke Suid-Afrikaanse gevalle waar die skuit oor dekades heen mense ryk gemaak het, dan gestroop word van alle waardevolle en bruikbare artikels en aan sy eie lot oorgelaat word tot 'n kopseer vir andere...En so eindig die verhaal van nog 'n formidabele vistreiler in die geskiedenis van die Suid-Afrikaanse visbedryf.

 

'n TWEEDE KANS VIR "BLOUDAM"? Afgeneem hieronder op 10 November 2025 word die eertydse Southern Sea Fishing kreefskuit genaamd "Bloudam" verskuif na die Presidentskaai in Saldanhabaai, vanwaar die skuit nou 'n nuwe swart romp kleurskema vertoon nadat die skuit vir etlike jare "afgetree" gestaan het op die gronde van SSF. Of "Bloudam" egter haar naam gaan behou en watter funksie sy gaan verrig sal ons maar moet wag en kyk. En wie weet, in die tradisie van SSF mag haar nuwe naam dalk iets wees soos "Vaaldam" of "Swartzee", gegewe die nuwe kleurskema...                                  "NUWE" KLEURSKEMA                                                         "OU" KLEURSKEMA

 

"MR.M" WORD HERDOOP TOT                          "SEA QUEST" Afgeneem hieronder op 19 November 2025 in Walvisbaai staan die snoekskuit "Sea Quest" met 'n nuwe rooi kleurskema asook 'n nuwe naam, dit nadat die skuit voorheen bekend gestaan het as "Mr.M" en 'n wit kleurskema vertoon het.                                      "SEA QUEST"                                             DIE OU "MR.M"                    Terug in tyd toe oom Anton Tallie haar gebou het was             hierdie klas skuite deur Tallie Marine bemark                       as "the little white elephant".

 

DEPARTEMENT PUBLIEKE WERKE...             WAT HET ONS HIERSO? Gedurende Junie-maand 2025 is verskeie nuwe kennisgewingborde by die nege geproklameerde vissershawens langs die kuslyn opgerig. Trawler Heritage het by 'n vorige opdatering aan die crew die nuwe kennisgewingborde gewys, maar aai dit was nie lank nie, toe hierdie kennisgewingbord aangetref is op 31 Augustus 2025 op die Saldanhabaai skeepshelling. Trawler Heritage wil nou nie onvanpaste opmerkings skryf nie, maar sekerlik moet dit wat hierso uitgebeeld word 'n vorm van korrupsie wees? Kom ons begin net met die spelfoute, "extunguisher" en "parkign". Sekerlik moes 'n persoon verbonde aan Departement Publieke Werke aanvanklik 'n nota gemaak het met die verlangde boodskap wat oorgedra moes word, waarna dit aan 'n verkose drukker gestuur is, wat darem sekerlik/moontlik 'n vorm van kwaliteitsversekering moet toepas nadat die drukwerk voltooi was aangaande spelfoute. Hierna is die betrokke kennisgewingborde weer aan 'n subkontrakteur verskaf vir die montering van die kennisgewingborde. Dalk/moontlik/miskien sou die subkontrakteur die spelfoute opgemerk het en dit aan Departement Publieke Werke gerapporteer het...so sou mens kon redeneer, maar nee, in beide gevalle lag beide die drukker sowel as die subkontrakteur in die mou al die pad bank toe, selfvoldaan nadat hul nog 'n regeringskontrak kon los slaan (die splinternuwe Merc seker alreeds bestel). Trawler Heritage is egter meer bekommerd oor die onvanpaste boodskap wat die kennisgewing bord uitdra - "parking limited 30 mins". Nou kyk mense, op hierdie dorre stuk aarde waarop die Saldanhabaai skeepshelling geleë is, is daar meer parkering beskikbaar as op die Kaapse parade gronde! Aldus moes die woord "limits" gebruik gewees het, maar dit laat ons nou weer met 'n ander tameletjie, want om die woord "limits" te gebruik sal ook onvanpas wees. So waarop kom dit dus neer? Kan ons 'n slip-spietkop te wagte wees wat met sy boekie en 'n "stop watch" daar gaan rond stap en kaartjies links en regs uitdeel wanneer die 30 minute verstryk het? (Daai slip-spietkop sal nog so kaartjies skryf totdat hy per ongeluk dit op die CFP-bakkies se ruite begin plak en sy moses teëkom). Hierdie is maar net nog 'n bewys dat Department Publieke Werke geen, maar soos in geen idee het van wat op 'n skeepshelling rêrig gebeur nie - hoeveel werk kan mens verrig op 'n skuit as jy net 30 minute lank mag parkeer op die skeepshelling - jy gaan mos nooit klaar kry nie!