Sedert 2010            Trawler Heritage word opgedra ter nagedagtenis aan my oupa Eben Wessels, skipper van Runtu en Wildegans                                                               Kontakbesonderhede: trawlerheritage@gmail.com All material on this site is provided for personal reference only. All written material, photographs and video material on the website is copyright of www.trawlerheritage.co.za. If you wish to copy the information please e-mail me with your request. Where material had been used from other sources a note to the source/copyright holder will be given and you must abide to their rules before using any such material. No photograph nor video material which is property of Trawler Heritage is to be re-distributed on other websites, or cell phone applications without written permission. Deliberate manipulation or removal of the official Trawler Heritage logo from photographs or video material is considered unethical. If you feel that you have an issue with any information/photo displayed on this website, please e-mail me with your request and I will gladly remove it from this site.

 
                        
                           

   SKUITE NUUSBLAD / TRAWLER NEWSPAGE
                          
       (Periode:

 

BESOEK DIE S.A.VISSERYE MUSEUM    Waar die geskiedenis van ons visbedryf bly voortleef

       
         
        

            

            VISTREILER PROFIELE
 

                   


        KOMMERSIëLE SKI-BOOT   
                    PROFIELE

                     
  

         


                    

                        AN EMBLEM OF
          PROUD WORKMANSHIP

           
The sticker above is displayed on the CAT 3412 main engine of the Cape Town based longliner "Cape Challenger". The sticker "Caterpillar - always brings you home " is exclusively used by Ritco Marine situated in Brackenfell, who besides installation work, also service and maintain the machinery onboard the "Cape Challenger".

NUWE HAWE               KENNISGEWINGSBORDE Gedurende Junie-maand is verskeie nuwe kennisgewingborde by nege geproklameerde vissershawens langs die kus aangebring. Nuus oor die nuwe kennisgewingborde is wyd en syd verspreid en was selfs uitgesaai tydens nuus berigte op streeksradio stasies. Hieronder volg 'n paar voorbeelde van die nuwe en "vergete" naamborde wat onlangs oor Trawler Heritage se pad gespoel het...                                             NUWE KENNISGEWINGBORDE Afgeneem hieronder is nuwe sowel as ou kennisgewingborde sommer deurmekaar - duidelik is daar nie mooi rekord gehou van al die verskeie boodskappe wat oorgedra moes word tydens die vervaardiging van die nuwe reeks kennisgewingborde nie...                                         VERGETE KENNISGEWINGBORDE O'aardetjie tog! Hierso is dit duidelik dat Trawler Heritage elke hoekie en draai van elke hawe beter ken as die betrokke hawemeesters, wat in hierdie geval heeltemal vergeet het van hierdie reeks sonverbleikte kennisgewingborde wat sekerlik ook vervang moes word?                                               EFFEKTIEWE BOODSKAP? Afgeneem hieronder is 'n splinternuwe kennisgewingbord opgerig by 'n skeepshelling (ek glo almal weet waarso dit geleë is) waarvan die boodskap wat oorgedra word en dit wat in die rooi sirkel aangetoon word in skerp kontras is met mekaar. Dit bewys maar net weereens die totale gebrek aan selfdissipline wat daar heers in ons wêreld. Kom ons kyk hoe lank kan hierdie kennisgewingbord staande bly voordat die bord met paal en al voete gaan kry...

 

DEPARTEMENT PUBLIEKE                          WERKE...             WAT HET ONS HIERSO? Gedurende Junie-maand 2025 is verskeie nuwe kennisgewingborde by die nege geproklameerde vissershawens langs die kuslyn opgerig. Trawler Heritage het by 'n vorige opdatering aan die crew die nuwe kennisgewingborde gewys, maar aai dit was nie lank nie, toe hierdie kennisgewingbord aangetref is op 31 Augustus 2025 op die Saldanhabaai skeepshelling. Trawler Heritage wil nou nie onvanpaste opmerkings skryf nie, maar sekerlik moet dit wat hierso uitgebeeld word 'n vorm van korrupsie wees? Kom ons begin net met die spelfoute, "extunguisher" en "parkign". Sekerlik moes 'n persoon verbonde aan Departement Publieke Werke aanvanklik 'n nota gemaak het met die verlangde boodskap wat oorgedra moes word, waarna dit aan 'n verkose drukker gestuur is, wat darem sekerlik/moontlik 'n vorm van kwaliteitsversekering moet toepas nadat die drukwerk voltooi was aangaande spelfoute. Hierna is die betrokke kennisgewingborde weer aan 'n subkontrakteur verskaf vir die montering van die kennisgewingborde. Dalk/moontlik/miskien sou die subkontrakteur die spelfoute opgemerk het en dit aan Departement Publieke Werke gerapporteer het...so sou mens kon redeneer, maar nee, in beide gevalle lag beide die drukker sowel as die subkontrakteur in die mou al die pad bank toe, selfvoldaan nadat hul nog 'n regeringskontrak kon los slaan (die splinternuwe Merc seker alreeds bestel). Trawler Heritage is egter meer bekommerd oor die onvanpaste boodskap wat die kennisgewing bord uitdra - "parking limited 30 mins". Nou kyk mense, op hierdie dorre stuk aarde waarop die Saldanhabaai skeepshelling geleë is, is daar meer parkering beskikbaar as op die Kaapse parade gronde! Aldus moes die woord "limits" gebruik gewees het, maar dit laat ons nou weer met 'n ander tameletjie, want om die woord "limits" te gebruik sal ook onvanpas wees. So waarop kom dit dus neer? Kan ons 'n slip-spietkop te wagte wees wat met sy boekie en 'n "stop watch" daar gaan rond stap en kaartjies links en regs uitdeel wanneer die 30 minute verstryk het? (Daai slip-spietkop sal nog so kaartjies skryf totdat hy per ongeluk dit op die CFP-bakkies se ruite begin plak en sy moses teëkom). Hierdie is maar net nog 'n bewys dat Department Publieke Werke geen, maar soos in geen idee het van wat op 'n skeepshelling rêrig gebeur nie - hoeveel werk kan mens verrig op 'n skuit as jy net 30 minute lank mag parkeer op die skeepshelling - jy gaan mos nooit klaar kry nie!

 

DIS HOE ONS TRAWL!                        FEBRUARIE - MAART 2025 Met hierdie video gaan die stof uit die luidsprekers geskop word. Na sterk oorweging aangaande die inhoud van hierdie video, het Trawler Heritage van bakboord na stuurboord en weer terug na bakboord gegaan en uiteindelik besluit dat hierdie video kwalifiseer as 'n "dis hoe ons trawl" weergawe, pleks van 'n "iets van alles" weergawe. In hierdie video vang ons vis diep in die suide - daar's nie eintlik vis beskikbaar gewees nie, maar die visvang is intensief, en enige teken van iets met 'n stert aan sy lyf word gejag...                           VIR "ELOMI"   Op 3 Maart 2025 moes die trotste vissersvloot ter wêreld weereens afskeid neem van nog 'n gedugte stryd-os in die vloot. Asof die 2025 pelagiese seisoen nie alreeds genoeg drama opgelewer het nie, moes ons met 'n swaar hart afskeid neem van "Elomi" en in hierdie video hieronder bring Trawler Heritage vir oulaas hulde aan hierdie geliefde skuit van Laaiplek.                    IETS VAN ALLES     OKTOBER '24 - FEBRUARIE '25                              In die video hieronder word nie net die room van die Suid-Afrikaanse visbedryf uitgebeeld nie, maar ook hoe vinnig die noodlot kan toeslaan op die see. Die video word afgesluit met 'n argief video van "Bella Prima", waar sy vir oulaas die Trawler Heritage crew groet.                            VIR "BELLA PRIMA"                                         1968-2025  Nou ja mense, hoe neem mens afskeid van 'n skuit wat deel was van jou lewe oor soveel jare heen? In die video hieronder bring Trawler Heritage vir oulaas hulde aan een van die gedugste strydosse ooit, wat in diens was van die Suid-Afrikaanse pelagiese bedryf. Ons gaan jou mis "Bella Prima".             "AMORIA" STOKVIS TRIP                                OKTOBER 2024                              In die video hieronder is die stokvislanglyn skuit "Amoria" in aksie tydens 'n Oktober-maand stokvis trip daar ver in die noorde buitekant Hondeklipbaai.                                       IETS VAN ALLES                 APRIL - SEPTEMBER 2024 In die Iets van Alles video hieronder vir die tydperk April tot September 2024, word nie minder nie as 19 skuite en 'n skip uitgebeeld waaronder "Berggans", "Bateleur", "Michelle", "Seedelwer III", "Poseidon", "Wildegans II", "Stormgans", "Kolgans", "Vleigans", "Wafra", "Baby Ronald"; "Borderer"; "Ocean Blue", "Renja", "Romano Paulo"; "Ultra Galaxy", "Derek 1", "Karin 1"; "Duinekus" en "Imbaza". So, draai oop die volume knop en maak so bietjie geraas saam met die Trawlkampioene!                                         IETS VAN ALLES                      MAART - APRIL 2024 Reg mense, dis tyd om weer geraas te gaan maak daar in die Onderbaai met nog 'n "Iets van Alles" episode vir die tydperk Maart tot April 2024. Die oorgrootte van die videomateriaal is geneem op 23 Maart asook 15 April 2024. Alle drone beeldmateriaal uitgebeeld is verskaf deur Gert van Eeden en Ivan Mouton. Vir al die Caterpillar aanhangers daarbuite is die klankbaan van hierdie video gevul met die klinkende stamp geluide van Caterpillars, wat julle nog meer die reg gee om die volume knoppie wyd oop te draai!                                     "OCEANA AMETHYST" SINK                             TER SEE Hiermee moet Trawler Heritage aan die crew die hartseer nuus oordra dat een van Houtbaai se geliefde en bes versorgde skuite die "Oceana Amethyst", 'n stokvislanglynskuit gesink het op Vrydag agtermiddag 26 April 2024 sowat 14 seemyl reg wes van Llandudno nadat die skuit begin water in neem het. Die "Oceana Amethyst" is te hulp gesnel deur die "Penkop II" sowel as die N.S.R.I, waarna al die bemanningslede opgetel en by Redding 3 in die Waterfront geneem was. Die "Oceana Amethyst" was een van 'n handjie vol skuite wat nog behoue gebly het, wat terug in tyd deel gevorm het van die Da Gama Visbedryf op Houtbaai se pelagiese vloot. In die video hieronder word "Oceana Amethyst" se laaste minute uitgebeeld voordat die skuit onder die water verdwyn het, terwyl 'n leeftyd se herhinneringe van die skuit verby flits...      HOUTBAAI - 19 FEBRUARIE 2024 Reg mense, dis tyd om weer geraas te gaan maak op Houtbaai, vanwaar "Lisa Ann" die verrigtinge afskop op die maat van die voormalige "A-Team" klankbaan, net om aan te sluit by verlede maand se hoofopskrif, waarna alle chaos los breek en 40 skuite Houtbaai verlaat tydens 'n massavaart wat nie net uit Trawlkampioene bestaan nie, maar ook 'n klompie van die tunapaal asook kreefskuite.                            IETS VAN ALLES    DESEMBER 2023/JANUARIE 2024 Reg mense, dis tyd om weer geraas te maak met net die beste videomateriaal wat die trotste vissersvloot ter wêreld kan opdis vir die Trawler Heritage se crewmanne, vir die tydperk Desember 2023 en Januarie 2024. Vir diegene wie se maag nie sterk is in die slegte weer nie, drink maar eers 'n seesiekpilletjie, want dinge kan by tye so bietjie rof raak.

9 JANUARIE 2025             DIE DAG WAAROP                                     HOUTBAAI SE               VISBEDRYF STERF 9 Januarie 2025 omstreeks 12:55 nm. sal in die anale van die Suid-Afrikaanse visbedryf aangeteken word as die datum en tyd waarop die visbedryf in Houtbaai finaal gesterf het. In afwagting vir die kreefvloot om terug te keer huis toe, het Trawler Heritage ouder gewoonte stelling ingeneem by sy geliefde lighuisie op die Houtbaai langmuur en die seemyle geduldig af getel in afwagting vir die kreefvloot se terugvaart. Weens die algehele afsondering en kalmte van die res van die wêreld, het Trawler Heritage net daar op die kaai gaan sit, met gebuigde hoof en 'n diep gesprek met ons Here God aangeknoop waartydens ek Hom gevra en gesmeek het om ons pelagiese vloot te seën tydens die 2025 seisoen. My gesprek met God is egter geonderbreek deur "gangster-stemme" - en meteens staan daar twee manne voor my met lang messe, gereed om my leed aan te doen. Hulle eis R100 van my, maar benewens my kriekethoed en my mik-en-druk kamera het ek geen geld op my nie, nie eens 'n beursie nie. Met my kaal hande weer ek hulle aanslae keer op keer af, omring deur seewater links, regs en agter my, totdat daar 'n seiljag by die hawe se bek verby loop...die skipper en sy bemanning se oê is stip op die insident gerig en met 'n bulder stem roep die skipper uit "hold on, I am radio in the police"! Die aanvallers se aandag word vir 'n oomblik afgetrek en Trawler Heritage sien die kans en breek deur hulle. Gelukkig is die jeug en fiksheid nog aan Trawler Heritage se kant en daar laat waai ek af al langs die langmuur na veiligheid gevolg deur die twee aanvallers, terwyl die seiljag se skipper net daar in die hawe se bek 'n "u-turn" maak en al langs die langmuur afseil in 'n poging om my te beskerm, agter-om die yskaai, verby die slipkaai, en daar waar Da Gama se aflaaipompe eens gestaan het, het Trawler Heritage en die seiljag se paaie weer geskei, waarna die seiljag weer koers gevat het see toe. My grootste dank aan daardie seiljag om in 'n oomblik van angs my te vergesel het na veiligheid. Om te dink dat mens nie eens meer veilig is om in die openbaar tot jou Here God te mag bid nie, sonder om te vrees vir jou lewe nie - mag ons Here God hulle van die aarde af wegvee en nooit weer aan hulle dink nie, en sou God sy toorn oor Houtbaai loslaat gaan daardie plek tot in sy fondamente geskud word - vir hul totale barbaarse optrede deur 'n man aan te val terwyl hy op die kaai gesit en bid het tot sy Here God en Hom gevra het vir vis. En hiermee groet Trawler Heritage dan ook vir Houtbaai, niemand het voor my ooit die moeite gedoen om die ryk geskiedenis van Houtbaai se visbedryf aan te teken en te verfilm tot in die mate waarin Trawler Heritage dit vermag het nie, en na Trawler Heritage sal daar ook niemand weer wees nie. Ou Houtbaai, al wat ek vir jou kan sê, is ek is nou klaar met jou - jy en jou visbedryf het nou finaal gesterf!              Houtbaai se lighuisie op die langmuur - die plek waar Trawler Heritage aangeval is terwyl hy op die kaai gesit en bid het vir vis op 9 Januarie 2025.

TER NAGEDAGTENIS AAN          OOM RODNEY MISPLON Daar het in ons midde op 17 Junie 2025 nog 'n groot boom geval, met die nuus dat die legendariese bootbouer oom Rodney Misplon op 94-jarige ouderdom oorlede is. Oom Rodney was in sy leeftyd betrokke gewees by die bou van 501 skuite wat insluit trawlbakkies, kreefskuite, pelagiese skuite, navorsingsbote, patrolliebote, hoëspoed sport tuna bote, vragbote, asook N.S.R.I reddingsbote, vanwaar hy werksaam was oor die jare heen by Misplon & Co., Louw & Halvorsen, Globe Engineering en Republic Marine Contractors. Trawler Heritage was gevra om tydens die roudiens 'n huldeblyk te doen namens die hele Suid-Afrikaanse visbedryf, en hiermee vertrou ek dat daar nie 'n enkele booteienaar of visserman is wat nie sal saamstem met die huldeblyk oorgedra deur Trawler Heritage soos aangedui hieronder. En hiermee groet Trawler Heritage nog 'n mentor in my lewe. Met my laaste besoek aan oom Rodney, stop hy 'n foto van "Walvis Pioneer" in my hand en groet my - "jy weet mos wat gedoen moet word, en hoe dit gedoen moet word"...          The smell of oak, meranti, exotic hard woods and the constant hammering of block hammers at the yard of Louw & Halvorsen is today just a distant memory. High quality wooden hulls, each one a piece of art created by skillful shipwrights - Rodney Misplon being one of the finest. Exposed to the elements on a daily basis whether sun, rain, wind and cold, it was an environment in which Rodney thrived in. In a world dominated by productivity, turn over, overheads and fancy composite materials, the contribution by shipwrights like Rodney himself to a modern society are seemingly forgotten. Today, almost 50 years after the last wooden vessel left the yard of Louw & Halvorsen, 76 vessels still sail the seas around Southern Africa, bringing in their catches, every day and every night - all of them created by Rodney. Through determination and skillful craftsmanship Rodney Misplon has left behind a legacy over many decades not known by many, as for the following examples. The protection of our borders: By building navy patrol vessels as well as fisheries patrol vessels. Sea Trade: By building supply vessels, providing supplies to large bulk carriers passing the Cape of Good Hope. Rodney's biggest contribution was towards the South African fishing industry - providing the industry with hundreds of fishing vessels of all sizes - representing the pride of many fishing communities around the coast. The fishermen put all their trust in the craftsmanship of Rodney to provide them with sturdy boats, strong enough to survive even the biggest Cape winter storm. Rodney's craftsmanship contributed to the wealth and prosperity of the fishing industry in many ways... Rodney has helped to pay the school and university fees of the fishermen's children. Rodney has helped the fishermen to buy homes, vehicles, food, clothing and even Christmas presents - The amount of cups of coffee, packets of cigarettes and glasses of brandy the fishermen consumed, only the heavens know... Rodney even made a contribution regarding food security to millions of South Africans. Milk for instance, people think that dairy comes from the farm, but in fact it comes from the sea. The dairy farmers are dependant on the fishermen to catch fish, which is then converted into fish meal, an important source of protein for the cattle. Every time you pour milk into your coffee, chances are good that the cow was fed fish meal, caught by a boat, build and maintained by Rodney himself. Driving past a KFC, you don't smell chicken, you smell fish meal! So next time you enjoy your Streetwise Two meal, chances are good that the chicken was fed fish meal, caught by a boat build and maintained by Rodney himself. I am going to leave you with one last story. I once came across a Misplon boat standing on dry ground at the Cape Docks with graffiti written on it's lower hull, apparently written by a guy called "Pinocchio" - maybe he also had a long nose, I don't know, but what was written was a true reflection of Rodney Misplon's life: "When boats were wood, and men were men".

NUWE KLEURSKEMA                        VIR "STORMGANS" Afgeneem hieronder op 18 Desember 2025 in Gansbaai spog "Stormgans" met 'n nuwe blou-en-wit kleurskema, vanwaar die skuit voorheen 'n blou-en-grys kleurskema vertoon het.                                   "NUWE" KLEURSKEMA                                                        "OU" KLEURSKEMA

NUWE KLEURSKEMA VIR                    "SOUTH WEST TERN" Afgeneem hieronder op 19 November 2025 in Walvisbaai vertoon die stokvislanglynskuit "South West Tern" 'n nuwe wit en anti-fouling kleurskema, vanwaar die skuit voorheen 'n ligbou-en-wit kleurskema vertoon het.                                  "NUWE" KLEURSKEMA                                                     "OU" KLEURSKEMA

LANK LEWE DIE TRADISIE     VAN LAMBERTS BAY CANNING!                NUWE KLEURSKEMAS                VIR "EL PESCADOR"                        EN "CONRAD" Afgeneem hieronder op 10 November 2025 in Saldanhabaai spog die kreefskuit "El Pescador" ook nou in die tradisionele kleurskema van Lamberts Bay Canning, vanwaar die skuit voorheen slegs 'n rooi kleurskema vertoon het.                               "NUWE" KLEURSKEMA                                                "OU" KLEURSKEMA              Afgeneem hieronder in Lambertsbaai spog die kreefskuit "Conrad"  ook nou in die tradisionele kleurskema van Lamberts Bay Canning, vanwaar die skuit voorheen 'n wit-oranje-blou kleurskema vertoon het.                                     "NUWE" KLEURSKEMA                                                        "OU" KLEURSKEMA

"SILVER DORADO" VERWOES                       IN VLAMME HEL Afgeneem hieronder op 12 Januarie 2025 is die tjokkaskuit "Silver Dorado" aan haar eie lot oorgelaat nadat 'n brand aanboord ontstaan het buitekant Noordhoek naby Port Elizabeth. Al 21 bemanningslede is opgepik deur die tjokkaskuite "Loligo", "Maverick", "Raka" en "Vulcan".            Afgeneem hieronder op 13 Januarie 2025 by Cape Receife lê die smeulende romp van "Silver Dorado" op die klippe uitgespoel.               "Silver Dorado" is afkomstig uit dieselfde mould as die "Willem W", en vir diegene wat vir "Willem W" ken sal weet wat se mooi skuite dit was wat Tallie Marine in die laat 1990's gebou het...

"BEGONIA" WORD BEKRAP En so het ons toe al die tyd onder 'n wanindruk verkeer en gedog dis net Suid-Afrikaanse skuitverwers wat kan nonsens aanjaag? Gegewe die foto hieronder wat geneem is op die Walvisbaai syncrolift, wil dit voorkom asof dit ook 'n internasionale probleem is, gegewe hoe die skuitverwers op Walvisbaai die "Begonia" se agterstewes bekrap het, waarby hulle instede net "Luderitz" sommer die "Kaapstad", sowel as die ou "CTA" nommers ook weer geverf het wat inderwaarheid geen betekenis meer het nie. Hoe hoog op "thinners" moet 'n mens wees om hierdie klas nonsens aan te jaag?                        Dalk is die scaffolding so hoog en die lug so dun             daarbo, dat die breinfunksies heeltemal uitsny?

DIE SKUIT-TOILET UPDATE Reg mense, dis weer tyd om nader te sit om te kyk wat alles aangaan in die onderwêreld van skuit-toilette. Afgeneem hieronder op 10 September 2025 in die Kaapse dokke beloer ons "South West Lapwing" se skuit-toilet van naderby. Nou kyk, in die afwesigheid van 'n toilet-sitplek gaan 'n man dit maar moeilik hê in 'n rol-see, met jou bene voor jou uitgestrek en top bootse wat vasskop, hande wat weerskante van jou teen die "partitions" druk, met 'n rolletjie toiletpapier wat jy tussen jou tande vasbyt! Soos Trawler Heritage al telkemale vermeld het, is 'n dek wat rol en 'n rolletjie toiletpapier nie maatjies nie, en het dit al talle vissermanne letterlik met hul oliebroeke op hul knieë uitgevang, waar hulle hande-viervoet (sonder om te brul) agter 'n rolletjie toiletpapier aan kruip - dis 'n morsige besigheid om die minste te sê!                           "TOMREN" MAAK VOORSIENING             VIR ITôTIE EN ITêTIE! Nou toe nou, kyk net so vir "Tomren" - die skuitjie spog nou selfs met 'n "unisex" skuit-toilet! Ja wel, dis nou as mens die kennisgewingbordjie buite op die skuit-toilet se deur seker ernstig kan opneem? Afgeneem hieronder op 10 September 2025 langs die Ooskaai toon die rooi sirkel die unieke kennisgewingbordjie aan buite op die skuit-toilet se deur van die "Tomren"...                     Daarsy, sien dis bedoel vir itôtie sowel as itêtie...hoe dan anders? En op hierdie noot trek ons eers weer die (anker)ketting. Tot 'n volgende keer, skuit-skuit, my storie is uit!

DIE TROTSTE VISSERSVLOOT TERWêRELD NEEM AFSKEID VAN 'n LEGENDARIESE SKIPPER EN VLOOTBESTUURDER

"OCEANA RUBY" WORD          HERDOOP TOT "TENDAI" Afgeneem hieronder op 26 Januarie 2026 op Laaiplek is die voormalige "Oceana Ruby" wat voortaan bekend sal staan as "Tendai", wat in Shona-taal beteken "danksegging aan God". En daarmee neem ons afskeid van nog 'n "Oceana" skuitnaam waarmee ons groot geword het, en waarskynlik nooit weer op 'n ander skuit sal pryk nie - en nog 'n klein stukkie van Houtbaai se geskiedenis verdwyn onder ons oë in die niet...

DIE SKUIT-TOILET UPDATE Afgeneem hieronder op 26 Januarie 2026 op Laaiplek is hoe "Nossob" se whale back area tans daarna uitsien vanwaar die skuit tans gesloop word langs die kaai. Nou soos wat die skuit tans daarna uitsien is alle werkende toerusting alreeds van die skuit verwyder - daar is niks meer oor van waarde nie - rêrig? En hiermee gaan Trawler Heritage vir die soveelste keer vir die crew bewys dat die skuit toilet die sterkste voorwerp is op enige skuit wat selfs die aanslag van tien pond hammers en kettingsae kan oorleef...kyk gou wat staan daar in die rooi omkringde sirkel...die skuit se toilet!                                                        "NOSSOB" SE SKUIT TOILET                                                  Alles op die skuit is faktap geslaan                   (aai dammit daar vloek ek nou) maar die                                    skuit toilet is nog staande...

"BORDERER" SJOR IN                        DIE SARDYNE Afgeneem hieronder op 24 Januarie 2026 is "Borderer" besig om haar eerste skep sardyn vir die 2026 pelagiese seisoen in te pomp, skaars twee myl se loop buitekant Gansbaai se hawemuur.

                    DIE 2025 AGTERSKOT  
                            OPDATERING 
                       NOU  BESKIKBAAR

Môre-môre, ek vertrou dit gaan nog goed met die crew. Net soos die hoofopskrif aandui het  Trawler Heritage seker gemaak dat die trotste vissersvloot ter wêreld sy status behou, nadat die opdaterings oor die afgelope maande baie skaars geraak het weens dummies, bababottels, vuil doeke en 'n groot pelagiese projek wat meeste van my tyd opgeneem het. En nee, Trawler Heritage was nie betrokke by die bou van Suid-Oranje se nuwe vismeelaanleg nie, en vir diegene wat deur die skrefies wil loer by Tallie Marine en Sachal, julle kyk in die verkeerde rigting! Daar is weer 'n kultuurskok oppad in ons visbedryf, die grootste een sedert 2007 toe die uitgesterwe "gans-name" een vir een uit die dode opgeroep is, maar meer daarvan in 'n latere uitgawe - laat ons maar eerder nie nou 'n trop slapende robbe by Kaap Kruis wakker maak nie...So klompie maande gelede vat ons die pad hier af Kaap toe vir die jaarlikse "Blessing of the Fleet" om die skuite te laat seën vir goeie vangste en vir die vissermanne se veiligheid ter see. Ek was vooraf gewaarsku, maar kom laat ek sommer terselfde tyd ook ander waarsku wat die "Blessing of the Fleet" nog gaan bywoon in die toekoms...Daardie "heilige water" waarmee die katolieke priester die skuite mee seën...bly weg van dit af! Moenie dat dit net eers per ongeluk op jou of op jou vrou spat nie - dis moeilikheid! Daardie water maak mens vrugbaarder as 'n Grabou-appel! Die gevolg? Die eerste baba-dogtertjie in 36 jaar in die familie maak haar verskyning ('n klein wonderwerk op sy eie). Volgens die tradisie waar ons die skuite na die kinders vernoem, het Trawler Heritage die gewoonte op sy kop gekeer en hierdie keer die kind na 'n skuit vernoem, en het die voorreg vir "Sette Mari" te beurt geval. Die Walvisbaaiers sal vir jou sê daar was so 'n skuit, die Onderbaaiers sal vir jou sê daar is so 'n skuit, en die vrou agter die toonbank by Binnelandse Sake het my vraend aangekyk want mens kon sommer sien sy het nie mooi geweet hoe mens hierdie kind se naam uitspreek nie!

In die jongste uitgawe spoel die vissies behoorlik van die dek af, die visputte is geblok en ons hardloop ooplyne oralste langs die kuslyn op en af, van Walvisbaai tot onder in Port Elizabeth, Bobaai, Onderbaai, Voorbaai en Agterbaai deur en gly om elke puntjie wat in ons pad kom. Met meer as 800 fotos en 'n musiekvideo vir die tydperk 25 Februarie 2025 tot 1 Januarie 2026 word die room van die Suid-Afrikaanse visbedryf uitgebeeld. Trawler Heritage wil geensins "brag" met hierdie skep nie, maar gedurende 2025 is 'n totaal van 1622 fotos geplaas wat die trots uitbeeld van die Suid-Afrikaanse visbedryf, en sover dit Trawler Heritage se kennis strek is daar geen ander maritieme publikasie, nog enige ander sosiale media blaaie wat met hierdie getalle kon mee ding nie, nie in S.A. ook nie elders in die wêreld nie.

Die 2025 pelagiese seisoen is een wat nie lank onthou sal word nie, ons het skuite gesink en ons het skuite af geskryf en inteendeel, was dit nie vir die oorvloed Rooi-oê wat die vloot aan die gang gehou het, sou dinge andersins maar baie sleg gelyk het. Vir drie seisoene agtereenvolgens het die migrende skole Ansjovis die land "mis geswem" en waar presies hulle, hulself nou bevind kan mens net raai. Dalk, moontlik, miskien diep in die suide kruip hulle weg, waar selfs die mees tegnologies gevorderdste pelagiese vloot in Afrika hulle nie kan bykom nie. Gegewe die verwagte lewensduur van 'n Ansjovis moes die eerste van daardie drie "vermiste" generasies Ansjovissies alreeds afgesterf het. Een ding is wel duidelik, en dit is dat ons 'n sewe maerjare siklus betree het. Diegene wat dit nou sou waag om 'n nuwe skuit in die water te sit, doen dit op eie risiko, so nie gaan die bankpaaiement jou slapelose nagte besorg. Gedurende die 2025 pelagiese seisoen was daar selfs 'n verbod op die vang van sardyne geplaas, en hierdie keer nie weens 'n oormaat klein-sardyntjie nie, maar weens trae verbruikersaanvraag en 'n algehele oorproduksie van ingemaakte sardyne. Die groot sondebok hierso is die ingevoerde sardyne wat op die Suid-Afrikaanse mark verkoop word onder huishoudelike handelsmerke. Kom ons wees eerlik met mekaar, en daarby saam moet ek erken dat Trawler Heritage self 'n persoon is wat feitlik daagliks 'n blik sardyne verorber, sommer net-so met 'n vurk uit blik! Die probleem is dat verbruikers hul aptyt verloor het vir ingemaakte sardyne weens die "slegte" of sal ons sê die ongewone smaak en tekstuur daarvan - selfs die kat trek sy neus daarvoor op en stap weg. Sedertdien Langeberg Ko-op sy deure gesluit het, is die smaak van tamatie purië net nie meer dieselfde nie, nadat die inmaakfabrieke genoop was om van alternatiewe verskaffers gebruik te maak. Die sardynbron word al vir dekades lank jaloers beskerm as 'n bron van protiëne vir menslike gebruik, en tog wil dit voorkom asof die sardynbron stadig maar seker weer soos onkruid aanteel gegewe die plate en plate vis wat op die sonars opgemerk word, maar netso ongehinderd agter gelaat moet word.

So gepraat van sardyn, ek lees die anderdag 'n historiese artikel van die Britse sleeptreiler genaamd "Kirkella". (en meteens sit die Walvisbaaiers nou kierts regop, want hulle onthou nog daai naam). Die "Kirkella" het gedurende 1967 'n stokvis ekspedisie onderneem en vanaf Hull in Engeland na Walvisbaai gevaar vanwaar die skuit (freezer stern trawler) werksaam was in die gebiedswaters van Suid-Wes Afrika. Die hele vangs is in die "Kirkella" se ruime gevries en is saam terug Engeland toe waar die vangs op die Britse vismarkte verkoop was. Dis egter die inhoud van die vangs wat Trawler Heritage se aandag getrek het, wat ingesluit het stokvis, monk, wit-steenbras, kabeljou, snoek en glo dit of nie....sardyne! Mense, en daar is nou finaal die bewyse dat terug in tyd dit nie saak gemaak het hoeveel wette en regulasies daar deur die destydse S.W.A Administrasie deurgevoer was nie, hulle kon eenvoudig net nie die sardyn bron binne Suid-Wes Afrika se gebiedswaters genoegsaam beskerm het teen buitelandse vissersvlote wat ongesteurd die bron kon plunder wat uiteindelik gelei het tot die totale ineenstorting daarvan nie.

                                             "Kirkella"
               

Die 2025 visseisoen sal egter onthou word vir alles wat geel is - geelkop sardyne, geelstert en geelvin tuna. Van geelbek het Trawler Heritage nie veel van gewaar nie. Die tuna manne het 'n uitstekende seisoen tot dusver beleef, en by tye het dit eerder gelyk asof die manne binne-in 'n akwariumtenk vol geelvin tuna vis gevang het. Dat die tuna manne tans in die geld baljaar is nie altemit nie. Interessant om op te merk dat die tuna manne wat huidiglik op die see is, slegs diegene is wat bootlenings het om terug te betaal, en reg ook so, werk hard en betaal julle skuite af voordat ook julle maerjare aanbreek.

Gedurende September-2025 lees ek van 'n persoon (binne die visbedryf) waarin die persoon sy ontevredenheid uitspreek dat die pelagiese fabriek waarby hy betrokke is alreeds produksie gestaak het gedurende daardie maand. En ek dink by myself, September-maand? Ou maat, jy is nog bevoorreg, terug in tyd het die pelagiese seisoen klokslag op 31 Augustus gesluit - met geen toegewings daarby nie, sodat die pelagiese bronne genoegsame tyd kon hê om hul eiertjies te gaan lê het. Vir 'n paar gelukkiges kon hulle weer Oktober-maand see toe gaan om te deel in die jaarlikse Makriel-bonanza, en daarna gedurende November en Desember maande het die pelagiese vissermanne gaan kreef vang. Maar, dit is ook al lankal iets van die verlede. Die makriel bron het ons immers ook uitgeroei, en dis veral die Russiese fabriekskepe wat binne ons gebiedswaters gewerk het, wat ook 'n groot aandeel daarin gehad het, gegewe dat dit nog die dae was van die oranje-blanje-blou. Laat mens nogal bietjie wonder nê?!


Die gebrekkige kennis rakende die huidige stand van sake sowel as die historiese agtergrond van die Suid-Afrikaanse visbedryf onder die algemene publiek (die 101.9% groep mense wat nie weet wat op die see aangaan nie) gaan Trawler Heritage se verstand te bowe. Dis die jaar 2026 en in 'n artikel wat slegs 'n dag of twee gelede gepubliseer word in die Daily Maverick, word daar met smaak gekorrespondeer aangaande die twee fabriekskepe van destyds by name "Suiderkruis" en "Willem Barendz" (Daily Maverick, maak net seker want julle spelling van die skepe se name is nie korrek nie). In die artikel word die waarheid verdraai dat beide skepe elk met 'n "lang net" toegerus was, kompleet met vriesgeriewe vir die vangste - Watse nonsens skryf die mense! In dieselfde artikel, is dit weer die ou afgesaagde storie van Chinese vistreilers wat tydens daglig net buitekant die 200-myl eksklusiewe sone lê, en dan tydens die nagtelike ure ons gebiedswaters binne dring en hul nette kom sleep tot teenaan ons kuslyn. Hoe de donner?! (verskoon my taal). Hoe doen mens dit, asseblief verduidelik dit vir my. Teen 'n gemiddelde spoed van 10 knope neem dit jou 'n dag, 'n nag en weer 'n halwe-dag net om die Suid-Afrikaanse kuslyn te bereik. Dan moet jy nog vis soek, jy moet nette afgooi, optrek, volmaak en dan weer "vlug" uit Suid-Afrikaanse gebiedswaters, 'n dag, 'n nag en 'n halwe-dag se loop ver tot by die 200-myl sone. Sulke denkwyses maak mos eenvoudig net nie sin nie!

Op 15 Januarie 2026 word Pioneer Fishing se nuut opgegradeerde vismeelaanleg van R170 miljoen amptelik geopen by Sandy Point hawe. Dit is uitstekende nuus vir die Suid-Afrikaanse pelagiese bedryf dat vismaatskappye op hierdie dag en uur nog bereid is om hierdie somme geld te investeer in die bedryf, eerder dat die bedryf maar net aanploeter met bestaande infrastruktuur. Alles goed en wel, maar in my leeftyd het Trawler Heritage gesien dat dit maak nie saak of jy die nuutste en duurste tegnologie aanwend, of die beste produksievloeie toepas nie, dis daarbuite by die aflaaipompe wanneer die dinge begin skeefloop wat die hele produksiesiklus tot op sy knieë dwing. Aan die einde van die dag is die effektiewe aflaai van die skuite die maak of breek van enige visfabriek. Die aflaaiers meld aan vir hul skofte, vol gepomp van "Monster" en "Score", blykbaar om die energie vlakke en konsentrasie te verbeter, maar dis seker net 'n "rumour"? Gedurende die pelagiese seisoen is daar gemiddeld net 156 seegaande dae beskikbaar, nie elke dag lewer vis op nie, maar sodra die vis dik loop dan is dit net drie dae voordat jy hoor hulle (aflaaiers) is moeg. Aflaaiwerk is nie altyd die skoonste van werke nie. Sou abattoirs glasvensters gehad het, sou veel minder mense vleis geëet het as wat tans die geval is - visfabrieke is nie ver agter nie. Die skippers voer 'n verbete stryd om can-vis se persentasie benutting so hoog as moontlik te hou, en in die geval van industriële vis laai jy al minder af hoe langer jy lê en wag teen die kaai. Die aflaaiproses is in baie gevalle die enigste interaksie wat die vissermanne met die fabriek het - wat die fabriek met die vis maak is hulle saak. Die aflaaiproses benodig passie en toewyding teen 'n hoë werkstempo. So, wanneer daardie laaste 5 ton uit die hold gepomp word, vat solank die deck wash en spuit die dek af, dit hoef immers nie te blink nie, maar elke bietjie help. Wanneer die skowwe en die bloedwater oormatig begin opdam op die kaai, vat die pyp en spoel af die kaai - daai water is mos immers verniet, ons betaal nie daarvoor nie! Kry die skuite terug in die see so gou moontlik en aan die einde van die maand is die geldjies, die agterskotte en die bonusse daar tesame met 'n glimlag op elkeen se gesig - en dis hoe 'n mens moet vis vang!

       Pioneer Fishing Vismeel Reduksie Scrubbers
      

En hiermee is dit eers weer tyd om te groet. Ek laat julle met een laaste gedagte van 'n persoon binne die visbedryf vir wie Trawler Heritage groot aansien het naamlik Tim Reddell, aangaande die huidige toestand van ons visbedyf - "it's about defending what we have and adding value". Die 2026 pelagiese seisoen is op hande en dis nou slegs oomblikke voordat die skuite begin dril en die hoeters lawaai. Tot 'n volgende keer, over!

 

TALLIE MARINE LAAT                     NUUTSTE PURSE SEINER                        TER WATER       GOOD-LUCK "FIGHTING LADY! Afgeneem hieronder op 17 Desember 2025 is die nuutste toevoeging tot die Suid-Afrikaanse pelagiese vloot, die 83-voet "Fighting Lady" wat gebou is deur Tallie Marine in Sandy Point hawe.

SACHAL LAAT NUUTSTE           TUNAPAAL SKUIT TER                         WATER         GOOD-LUCK "SANTA MARIA! Afgeneem hieronder op 12 Desember 2025 is die nuutste toevoeging tot die Suid-Afrikaanse tunapaal vloot, die 47-voet "Santa Maria" wat gebou is deur Sachal in Vredenburg. Die "Santa Maria" sal voortaan werksaam wees vanuit Houtbaai. Benewens tunapaal, sal die skuit ook ingerig word vir die vang van lewendige aas.

NUWE STOKVISTREILER                       VIR WALVISBAAI                        GOOD-LUCK            "ATLANTIC CHALLENGE! Afgeneem hieronder is die "Atlantic Challenge", die nuutste toevoeging tot die Namibiese stokvisvloot wat op 17 November 2025 in Walvisbaai gearriveer het tydens haar afleweringsvaart vanaf Skotland. Die "Atlantic Challenge" is 131-voet lank en is gedurende 1999 ter water gelaat.

"OCEAN FRESH" SE                  SUSTERSKUIT TE KOOP 'n Mens mag nie begeer nie, maar kyk net watse skuit is tans in die mark verbonde aan Latvia se pelagiese visbedryf - een van "Ocean Fresh" se susterskuite! Vir diegene wat kennis het van "Ocean Fresh", sal saamstem dat hierdie kaliber skuite uiters geskik is vir die Suid-Afrikaanse pelagiese bedryf en kan net so aangewend word in plaaslike omstandighede sonder om te veel te torring aan die bestaande uitleg van die skuit. Wat hierdie skuit (gebou in 2003) nog meer geskik maak, is die feit dat sy aangedryf word deur 'n Caterpillar hoofmasjien en nie 'n Mitsubishi soos in "Ocean Fresh" se geval nie. Aai-aai, 'n man kan net droom daarvan om met so 'n skuit te kan werk - met hierdie skuite kan jy sjor in die vis dat net die wielhuisie nog uitsteek...

"JAMES ARCHER" GAAN AWOL    OP HAAR EIE TOT INKAALDUINE Afgeneem hieronder vroeg gedurende Januarie 2026 lê "James Archer" nou uitgespoel by Kaalduine, aan die noordekant van Lambertsbaai. Iewerste in hierdie verhaal moes iemand so waar as wragtag met 'n oliebroek op die knieë uitgevang gewees het, want van so 'n bog storie het Trawler Heritage lanklaas van gehoor...Hoe op dees aarde breek 'n skuit los voor die ou skaalhuisie binne-in Lambertsbaai se hawe, dryf uit die hawe, eers af slip se kant toe, en dan weer skerp links sonder om 'n klip te slaan, en spoel uit by Kaalduine! Don't talk crap to me! Dalk eerder het iemand tot sy sinne gekom en besef die probleem op hande is veels te groot om te hanteer en die skuit by die hawe uitgehelp en gehoop dit gaan self die probleem oplos? Dis nou maar een van daardie eg klassieke Suid-Afrikaanse gevalle waar die skuit oor dekades heen mense ryk gemaak het, dan gestroop word van alle waardevolle en bruikbare artikels en aan sy eie lot oorgelaat word tot 'n kopseer vir andere...En so eindig die verhaal van nog 'n formidabele vistreiler in die geskiedenis van die Suid-Afrikaanse visbedryf.

'n TWEEDE KANS VIR                         "BLOUDAM"? Afgeneem hieronder op 10 November 2025 word die eertydse Southern Sea Fishing kreefskuit genaamd "Bloudam" verskuif na die Presidentskaai in Saldanhabaai, vanwaar die skuit nou 'n nuwe swart romp kleurskema vertoon nadat die skuit vir etlike jare "afgetree" gestaan het op die gronde van SSF. Of "Bloudam" egter haar naam gaan behou en watter funksie sy gaan verrig sal ons maar moet wag en kyk. En wie weet, in die tradisie van SSF mag haar nuwe naam dalk iets wees soos "Vaaldam" of "Swartzee", gegewe die nuwe kleurskema...                                  "NUWE" KLEURSKEMA                                                         "OU" KLEURSKEMA

"MR.M" WORD HERDOOP                    TOT "SEA QUEST" Afgeneem hieronder op 19 November 2025 in Walvisbaai staan die snoekskuit "Sea Quest" met 'n nuwe rooi kleurskema asook 'n nuwe naam, dit nadat die skuit voorheen bekend gestaan het as "Mr.M" en 'n wit kleurskema vertoon het.                                      "SEA QUEST"                                             DIE OU "MR.M"                    Terug in tyd toe oom Anton Tallie haar gebou het was hierdie klas skuite deur Tallie Marine bemark                   as "the little white elephant".

SACHAL STAAN REG OM                            LOS TE GOOI!                                      GOOD-LUCK                          "CREATIVITY"! Afgeneem hieronder op 26 Januarie 2026 by die Sachal skeepswerf in Vredenburg staan die jongste toevoeging tot die Suid-Afrikaanse pelagiese bedryf, genaamd "Creativity". Geskoei op die boulyne van haar voorganger die "Stormgans", is daar heelwat nuwe toevoegings sowel as kreatiwiteit aan die dag gelê met die vervaardiging van hierdie prag skuit oor die afgelope 10 maande. Kenmerkend op die bakboord boeg area is die anker se "hawser" pyp wat na dekades weer 'n "come back" maak. Terug in die laat 1960's was dit suksesvol aangewend deur beide Louw & Halvorsen asook Maritime Industries. Met die jare heen het die gebruik van die "hawsers" egter in ongebruik verval en is die laaste een nog gedeeltelik te siene op "Gregory Justin", alhoewel dit vandag bedek is onder tien lae glasvesel. Soos gebruiklik sal die "Creativity" padlands vervoer word na Sandy Point hawe vir die ter water lating wat voorlopig geskeduleer is vir 30 Januarie 2026, gegewe die heersende weersomstandighede en die gepaardgaande gety by aankoms in Sandy Point hawe.                        Afgeneem hieronder is die "Creativity" staande gemaak op 'n nuut ontwerpte "cradle" wat bo-op die vragmotor se sleepbak gemonteer sal word vir die moeisame tog see toe.                              Afgeneem hieronder op 2 Februarie 2026 vertrek "Creativity" padlangs oor 'n afstand van 23km vanaf Vredenburg na Sandy Point hawe.

    



             
             

 



             
 



                         



         

   .