|
Sedert 2010 Trawler Heritage word opgedra ter nagedagtenis aan my oupa Eben Wessels, skipper van Runtu en Wildegans Kontakbesonderhede: trawlerheritage@gmail.com All material on this site is provided for personal reference only. All written material, photographs and video material on the website is copyright of www.trawlerheritage.co.za. If you wish to copy the information please e-mail me with your request. Where material had been used from other sources a note to the source/copyright holder will be given and you must abide to their rules before using any such material. No photograph nor video material which is property of Trawler Heritage is to be re-distributed on other websites, or cell phone applications without written permission. Deliberate manipulation or removal of the official Trawler Heritage logo from photographs or video material is considered unethical. If you feel that you have an issue with any information/photo displayed on this website, please e-mail me with your request and I will gladly remove it from this site. |
Hul name sal nooit weer vergeet word nie...
Laaste Opdatering: 27 Augustus 2025
SKUITE NUUSBLAD / TRAWLER NEWSPAGE
(Periode: 29 Augustus 2023 - 28 Februarie 2025)
|
BESOEK DIE S.A.VISSERYE MUSEUM Waar die geskiedenis van ons visbedryf bly voortleef   |
VISTREILER PROFIELE
KOMMERSIëLE SKI-BOOT
PROFIELE
AN EMBLEM OF
PROUD
WORKMANSHIP
The sticker above is displayed on the CAT 3412 main engine of the
Cape Town based longliner "Cape Challenger". The sticker "Caterpillar - always brings
you home " is exclusively used by Ritco Marine situated in Brackenfell, who
besides installation work, also service and maintain the machinery onboard the "Cape
Challenger".
|
"LAPPOP"
WORD VERSKUIF
Afgeneem hieronder op 8 Mei
2025 op die perseel van Ritco Marine in Brackenfell word die "Lappop"
verskuif ten einde meer vloerspasie binne-in die werkswinkels te
kon bewerkstellig het. |
|
HOU JOU HANDE VAN MY VISBAKKE AF!
Nou kyk, vissermanne wat mekaar se
visbakke steel is al so oud soos die berge. Dit wil tog voorkom
asof die manne van Letap Fishing radeloos is aangaande hul
visbakke wat gesteel word, siende dat hul die saak baie
persoonlik opneem met 'n boodskappie vir al die visbak-diewe
daarbuite... |
|
DIE SKUIT-TOILET UPDATE Reg mense, dis weer tyd om nader te sit om te kyk wat aangaan in die onder-wêreld van skuit-toilette. Afgeneem hieronder op 1 Julie 2025 in die Kaapse dokke beloer ons die skuit-toilet van "Leontina Maria" van naderby - uitsluitlik bedoel vir 'n "nommer twee", soos in groot vet letters aangetoon word by die ingang...Tot 'n volgende keer, skuit-skuit my storie is uit!  |
|
VERBOUINGS UPDATE Met die 2025/2026 tunapaal seisoen wat oor bietjie minder as twee maande begin, word talle bote alreeds versien vir die nuwe seisoen soos in die geval van "Blue Dolphin" en "Armando" hieronder gesien op 1 Julie 2025, waar die skuitverwers besig is om die skuite weer skoon te verf. "BLUE DOPLHIN"  "ARMANDO"  NUWE DUBBELWIELHUIS VIR "KENTUCKY" Afgeneem hieronder op 1 Julie 2025 langs die Collier jetty in die Kaapse dokke is die "Kentucky" nou te sien met haar splinternuwe dubbelwielhuis.  "STAALKOP" - A TASTE OF PORTUGAL Met groen seegras wat kleef aan "Staalkop" se romp, vertoon die skuit die nasionale kleure (rooi-wit-groen) van Portugal...soos afgeneem hieronder op 1 Julie 2025 langs die Collier jetty.  NUWE NAVIGASIE TOERUSTING VIR "TINA" EN "SEA PRIDE II" Afgeneem hieronder op 1 Julie 2025 in die Kaapse dokke vertoon "Tina" ook nou 'n Fleetone satnav antenna op die wielhuis se dak soos aangetoon met die rooi sirkel.  Afgeneem hieronder op 1 Julie 2025 in die Kaapse dokke is 'n nuwe Onwa radar gemonteer op "Sea Pride II" soos aangetoon met die rooi sirkel. Vir 'n hele aantal maande voorheen was daar geen radar te siene gewees op die skuit nie, vanwaar die skuit voorheen met 'n Furuno radar toegerus was.  NUWE VLEKVRYE STAAL TRAPLEER VIR "WILMAG" Afgeneem hieronder op 1 Julie 2025 in die Kaapse dokke is 'n nuwe vlekvrye trapleer gemonteer op die "Wilmag", vanwaar die skuit voorheen ook toegerus was met 'n vlekvrye staal trapleer wat om die een of ander rede verwyder is.  Afgeneem hieronder is die betrokke vervaardiger se barcode nog te siene op die nuwe trapleer - die ding is nog nat-nuut!  Geneem vanuit die Trawler Heritage argief is hoe die "Wilmag" se eertydse vlekvrye staal trapleer daarna uitgesien het.  "CHAR-NEIL" WORD HERBOU 'n Mens kan nie anders om jou hoed af te haal vir almal wat 'n bydra gelewer het om die "Char-Neil" weer in hierdie kondisie te kon kry nie. Gegewe die haglike omstandighede waarin die skuit haarself in bevind het - eers onseewaardig verklaar, toe afgeskryf met gepaardgaande hofsake en al daardie lelike dinge waaroor mens nie wil praat nie. Afgeneem hieronder op 28 Julie 2025 op Laaiplek, en die Suid-Afrikaanse pelagiese bedryf is op die vooraand om nog 'n skuit ryker te word, nadat die sektor alreeds gedurende die 2025 seisoen vier skuite verloor het.  STEENBERGS COVE FISHING TREK NUWE BAADJIE AAN Afgeneem hieronder op 28 Julie 2025 staan die uitgediende visstore van die voormalige pelagiese fabriek van Steenbergs Cove Fishing wat onlangs opgeknap is met 'n skoon laag wit verf.  Geneem vanuit die Trawler Heritage argief is hoe die uitgediende fabriek van Steenbergs Cove nie te lank gelede nog vertoon het nie...  "SILVER CHALLENGER" KRY 'n ONDERSTEBO VLAGGIE Afgeneem hieronder op 28 Julie 2025 in Sandy Point hawe vertoon "Silver Challenger" ook nou 'n Suid-Afrikaanse vlag...onderstebo en al, en daarby wonder Trawler Heritage hoe patrioties is jy werklik, as jy na 31 jaar nog nie weet watter kant van jou landsvlag is bo en watter kant is onder nie?  'n VISSERMAN MAAK 'n PLAN?! Afgeneem hieronder op 2 Augustus 2025 in Houtbaai en iemand het dit goed gedink om sommer 'n leë koeldrankbottel te omskep in 'n omhulsel vir 'n deklig. Ja ou maat, hoop maar vir jou part die surveyor het nie sy brille aan op die dag nie, so nie gaan jy nie "pass" met daai gedoente nie.  Kyk, daar is nog een ding van 'n trawlskuit wat Trawler Heritage nog nooit kon verstaan nie, want hoekom en waarom die crewmanne alewig, of die focsle, of die mesh room, of beide, se ligomhulsels afskroef, en dit in asbakkies omskep...En dan staan jy daar voor die surveyor soos iets wat rym met "oos", want die blêrrie ligomhulsel was dan op sy plek gewees die laaste keer dat jy daar verby geloop het...sal dit nooit ooit kan verstaan nie. |
|
NUWE HAWE KENNISGEWINGSBORDE Gedurende Junie-maand is verskeie nuwe kennisgewingborde by nege geproklameerde vissershawens langs die kus aangebring. Nuus oor die nuwe kennisgewingborde is wyd en syd verspreid en was selfs uitgesaai tydens nuus berigte op streeksradio stasies. Hieronder volg 'n paar voorbeelde van die nuwe en "vergete" naamborde wat onlangs oor Trawler Heritage se pad gespoel het...  NUWE KENNISGEWINGBORDE Afgeneem hieronder is nuwe sowel as ou kennisgewingborde sommer deurmekaar - duidelik is daar nie mooi rekord gehou van al die verskeie boodskappe wat oorgedra moes word tydens die vervaardiging van die nuwe reeks kennisgewingborde nie...  VERGETE KENNISGEWINGBORDE O'aardetjie tog! Hierso is dit duidelik dat Trawler Heritage elke hoekie en draai van elke hawe beter ken as die betrokke hawemeesters, wat in hierdie geval heeltemal vergeet het van hierdie reeks sonverbleikte kennisgewingborde wat sekerlik ook vervang moes word?  EFFEKTIEWE BOODSKAP? Afgeneem hieronder is 'n splinternuwe kennisgewingbord opgerig by 'n skeepshelling (ek glo almal weet waarso dit geleë is) waarvan die boodskap wat oorgedra word en dit wat in die rooi sirkel aangetoon word in skerp kontras is met mekaar. Dit bewys maar net weereens die totale gebrek aan selfdissipline wat daar heers in ons wêreld. Kom ons kyk hoe lank kan hierdie kennisgewingbord staande bly voordat die bord met paal en al voete gaan kry...  |
|
DIE SKUIT-TOILET UPDATE Reg mense, dis weer tyd om nader te sit om te kyk wat aangaan in die onder-wêreld van skuit-toilette. Afgeneem hieronder op 1 Julie 2025 in die Kaapse dokke beloer ons die skuit-toilet van "Leontina Maria" van naderby - uitsluitlik bedoel vir 'n "nommer twee", soos in groot vet letters aangetoon word by die ingang, of so nie sal jy ge-xxx word...Tot 'n volgende keer, skuit-skuit my storie is uit! |
|
HOUTBAAI N.S.R.I. SLOOP HUL STASIEGEBOU Afgeneem hieronder op 2 Augustus 2025 in Houtbaai is dit nog net die slip se spore in die sand wat oorgebly het van die voormalige stasiegebou van die plaaslike N.S.R.I. nadat die gebou slegs twee weke van tevore gesloop is om plek te maak vir 'n splinternuwe stasiegebou. Die nuwe stasiegebou se ontwerp sal geskoei word op die van die Tafelbaai N.S.R.I se stasiegebou wat geleë is by Quay Four in die V&A Waterfront, wat op die oog af meer lyk soos 'n glaskasteel. Of die Houtbaaiers hul nuwe stasiegebou met rus gaan laat sonder om die glaspanele stukkend te gooi, is iets waaroor mens net kan wonder...  Geneem vanuit die Trawler Heritage argief hieronder is hoe die Houtbaai N.S.R.I. stasiegebou altyd daarna uitgesien het. Hoeveel duisende kere het Trawler Heritage nie verby hierdie gebou al geloop en nooit ooit gedink dat dit tot niet gemaak sal word nie. Dit bewys maar net weereens dat niks op aarde permanent is nie - alles is maar net tydelik...  |
|
PERU
PURSE SEINER SE STACKER BREEK AF 'n Stacker wat los kom is enige pelagiese visserman wat agter in die "net bin" werk se grootste vrees. Afgeneem hieronder gedurende laat Junie-maand lê die skuit genaamd "Olga" wat deel vorm van Peru se pelagiese vloot, gestrand met haar net nog in die water, nadat die stacker se swaai-arm mors-af gebreek tydens 'n gooi soos aangetoon met die rooi sirkel. Tydens die insident het een visserman sy lewe verloor en is nog drie ander beseer.  |
|
DIS HOE ONS TRAWL!
FEBRUARIE - MAART 2025 Met hierdie video gaan die stof uit die luidsprekers geskop word. Na sterk oorweging aangaande die inhoud van hierdie video, het Trawler Heritage van bakboord na stuurboord en weer terug na bakboord gegaan en uiteindelik besluit dat hierdie video kwalifiseer as 'n "dis hoe ons trawl" weergawe, pleks van 'n "iets van alles" weergawe. In hierdie video vang ons vis diep in die suide - daar's nie eintlik vis beskikbaar gewees nie, maar die visvang is intensief, en enige teken van iets met 'n stert aan sy lyf word gejag... VIR "ELOMI" Op 3 Maart 2025 moes die trotste vissersvloot ter wêreld weereens afskeid neem van nog 'n gedugte stryd-os in die vloot. Asof die 2025 pelagiese seisoen nie alreeds genoeg drama opgelewer het nie, moes ons met 'n swaar hart afskeid neem van "Elomi" en in hierdie video hieronder bring Trawler Heritage vir oulaas hulde aan hierdie geliefde skuit van Laaiplek.
IETS VAN ALLES VIR "BELLA PRIMA" 1968-2025
Nou ja mense, hoe neem mens
afskeid van 'n skuit wat deel was van jou lewe oor soveel jare
heen? In die video hieronder bring Trawler Heritage vir oulaas
hulde aan een van die gedugste strydosse ooit, wat in diens was
van die Suid-Afrikaanse pelagiese bedryf. Ons gaan jou mis
"Bella Prima".
"AMORIA" STOKVIS TRIP
IETS VAN ALLES
IETS VAN ALLES
IETS VAN ALLES |
|
"MIZPAH" VAT VLAM Die onverskrokke 2025 pelagiese seisoen duur voort, en beproef tans ons vissermanne se reg op voortbestaan tot op die uiterste. Afgeneem hieronder in die vroeë oggendure van 25 April 2025 sowat 6.5 myl noord van Paternoster is "Mizpah" se agterstewes in ligte laaie. Die "Adenia" het egter bygestaan en kon suksesvol daarin slaag om die brand aanboord te blus, waarna die "Mizpah" na Sandy Point hawe gesleep is.  Afgeneem hieronder by aankoms in Sandy Point hawe is die erge brandskade wat "Mizpah" opgedoen het baie duidelik sigbaar. Hierso gaan dit iets verg in die lyn van 'n "halwe Boetie Akie oefening" om die skuit weer in die see te kry.  En skielik kry Trawler Heritage weer terug flitse van die "Langeveld II" wat destyds ook aan die brand geslaan het, maar onder ander omstandighede - die skade was feitlik presies dieselfde as in die geval van "Mizpah", maar in die "Langeveld II" se geval kon hulle haar ongelukkig nie weer gered het nie, die skade was te groot...aai dammit tog "Mizpah"... |
|
DEFICIENCY, DEFICIENCY, DEFICIENCY! Afgeneem hieronder op 7 Mei 2024 in die Kaapse dokke het die manne met die groen oorpakke en wit harde-hoede hul opwagting gemaak op die beide die "Nicolette" en "Chris Trautman". Hul missie? Om "deficiency" op "deficiency" op nog 'n "deficiency" op te spoor...  Daar's dit nou! Afgeneem hieronder met notaboekie op die skoot, word 'n hele rits "deficiencies" skynbaar gedokumenteer...  O'aarde tog, hieronder word die maatbande uit gehaal om die bulwarks se hoogte gemeet...en dan maak hulle sommetjies net om te bepaal dat "Chris Trautman" se bestaande freeing ports moontlik nie voldoende is nie...daar gaat jy, "deficiency", "deficiency", "deficiency"...  Op die een of ander wonderbaarlike manier oor 'n tydperk van amper 15 jaar het die manne van "SAAMSLAAP" dit vermag om nooit op te let dat "Elomi" die verkeerde areakode vertoon het nie...hoe weet julle dan of jul werklik die regte skuit survey het? Ek vra maar net? |
|
DIE HOUTBAAIERS VLUG KAAP TOE Weens toenemende misdaad en diefstal wat geheel en al hand uitgeruk het binne-in Houtbaai hawe, laat dit booteienaars met geen ander keuse as om veiliger lê-plekke te gaan opsoek nie. Afgeneem hieronder op 7 Mei 2025 het beide die stokvislanglynskuite "Estrela Do Mar" en "Valhalla" Houtbaai hawe vaarwel geroep nou 'n nuwe tuiste gevind in die Kaapse dokke. "ESTRELA DO MAR"  "VALHALLA"  |
|
"KENTUCKY"
WORD HERBOU Afgeneem hieronder op 7 Mei 2025 staan die tunapaalskuit "Kentucky" se wielhuis bo-op die Collier jetty vanwaar die skuit se Cummins masjien nou die einde van sy leeftyd bereik het, terwyl 'n splinternuwe dubbelwielhuis tans in aanbou is.   |
|
DIT WAS 'n VISFABRIEK! Afgeneem hieronder op 7 Mei 2025 in East Pier Road in die Kaapse hawe is hierdie splinternuwe kompleks opgerig op die einste stuk grond waar die voormalige kantore en fabriek van Premier Fishing, ook voorheen bekend as Atlantic Trawling eens gestaan het, en daarby saam word die maritieme bedryf al meer en meer vervreem vanuit die Kaapse dokke.  |
|
"VIOLA" WORD GESLOOP Sedertdien die langlynboot "Viola" haar opwagting gemaak het in Saldanhabaai gedurende 2012, het die skuit nog nie weer terug gegaan see toe, en het sy haar permanent gaan tuis maak langs die Slipkaai. Afgeneem hieronder op 14 Mei 2025 in Saldanhabaai word 'n mobiele hyskraan in gespan om hulp te verleen met die sloping van die "Viola".  Geneem vanuit die Trawler Heritage argief is die "Viola" tydens meer gelukkiger dae langs Slipkaai in Saldanhabaai.  |
|
SKUITE VAN ELDERS Afgeneem hieronder volg 'n seleksie van besoekers uit ander lande wat onlangs die Kaapse dokke besoek het waaronder 'n besoeker uit Portugal en twee besoekers vanuit Rusland. Afgeneem hieronder op 20 Februarie 2025 op die Kaapse synchroniseerhyser staan die Portugese langlynboot "Ribeira Do Mar".  Afgeneem hieronder op 7 Mei 2025 in die Robinson-droogdok staan die Russiese langlynboot "Alpha-Crux".  Afgeneem hieronder op 7 Mei 2025 langs die Weskaai in die Alfred Kom wag nog 'n Russiese langlynboot "RHTAPb-31" (wat ookal daai naam mag wees) vir 'n beurt om die Kaapse synchroniseerhyser te kan besoek.   Ou-maat ou-maat, met daai klas embleme op jou skuit, sowat 40 jaar gelede sou die regering 'n patrollieboot van die Vloot op gereedheidsgrondslag geplaas het, terwyl die lugmag se Albatros en Shackelton patrollie vliegtuie permanent in hul ore sou gedreun het, tot tyd en wyl hulle sou pad gee vanuit Suid-Afrikaanse gebiedswaters... |
|
9 JANUARIE 2025 DIE DAG WAAROP HOUTBAAI SE VISBEDRYF STERF 9 Januarie 2025 omstreeks 12:55 nm. sal in die anale van die Suid-Afrikaanse visbedryf aangeteken word as die datum en tyd waarop die visbedryf in Houtbaai finaal gesterf het. In afwagting vir die kreefvloot om terug te keer huis toe, het Trawler Heritage ouder gewoonte stelling ingeneem by sy geliefde lighuisie op die Houtbaai langmuur en die seemyle geduldig af getel in afwagting vir die kreefvloot se terugvaart. Weens die algehele afsondering en kalmte van die res van die wêreld, het Trawler Heritage net daar op die kaai gaan sit, met gebuigde hoof en 'n diep gesprek met ons Here God aangeknoop waartydens ek Hom gevra en gesmeek het om ons pelagiese vloot te seën tydens die 2025 seisoen. My gesprek met God is egter geonderbreek deur "gangster-stemme" - en meteens staan daar twee manne voor my met lang messe, gereed om my leed aan te doen. Hulle eis R100 van my, maar benewens my kriekethoed en my mik-en-druk kamera het ek geen geld op my nie, nie eens 'n beursie nie. Met my kaal hande weer ek hulle aanslae keer op keer af, omring deur seewater links, regs en agter my, totdat daar 'n seiljag by die hawe se bek verby loop...die skipper en sy bemanning se oê is stip op die insident gerig en met 'n bulder stem roep die skipper uit "hold on, I am radio in the police"! Die aanvallers se aandag word vir 'n oomblik afgetrek en Trawler Heritage sien die kans en breek deur hulle. Gelukkig is die jeug en fiksheid nog aan Trawler Heritage se kant en daar laat waai ek af al langs die langmuur na veiligheid gevolg deur die twee aanvallers, terwyl die seiljag se skipper net daar in die hawe se bek 'n "u-turn" maak en al langs die langmuur afseil in 'n poging om my te beskerm, agter-om die yskaai, verby die slipkaai, en daar waar Da Gama se aflaaipompe eens gestaan het, het Trawler Heritage en die seiljag se paaie weer geskei, waarna die seiljag weer koers gevat het see toe. My grootste dank aan daardie seiljag om in 'n oomblik van angs my te vergesel het na veiligheid. Om te dink dat mens nie eens meer veilig is om in die openbaar tot jou Here God te mag bid nie, sonder om te vrees vir jou lewe nie - mag ons Here God hulle van die aarde af wegvee en nooit weer aan hulle dink nie, en sou God sy toorn oor Houtbaai loslaat gaan daardie plek tot in sy fondamente geskud word - vir hul totale barbaarse optrede deur 'n man aan te val terwyl hy op die kaai gesit en bid het tot sy Here God en Hom gevra het vir vis. En hiermee groet Trawler Heritage dan ook vir Houtbaai, niemand het voor my ooit die moeite gedoen om die ryk geskiedenis van Houtbaai se visbedryf aan te teken en te verfilm tot in die mate waarin Trawler Heritage dit vermag het nie, en na Trawler Heritage sal daar ook niemand weer wees nie. Ou Houtbaai, al wat ek vir jou kan sê, is ek is nou klaar met jou - jy en jou visbedryf het nou finaal gesterf!  Houtbaai se lighuisie op die langmuur - die plek waar Trawler Heritage aangeval is terwyl hy op die kaai gesit en bid het vir vis op 9 Januarie 2025. |
.
'n GEBED VIR PELAGIESE
VIS
Heer,
hierby vra ons dat u die trotste pelagiese vloot ter wêreld sal seën met 'n
oorvloed pelagiese vis gedurende die 2025 seisoen. Hou asseblief u veilige hand
oor die vloot, vissermanne, fabriekspersoneel en die wat die kosmandjies
voorberei ten einde arbeid te kan verrig. Doen asseblief iets hier onder die
vissermanne wat vir U koningkryk 'n getuienis sal wees. Amen.
NUWE OPDATERING
NOU BESKIKBAAR
Môre-môre, ek vertrou dit gaan
nog goed met die crew. In die nuutste uitgawe van Trawler Heritage vir die
tydperk 5 Januarie tot 28 Februarie, is die 200 fotos dalk nie so baie soos
altyd nie, maar sjoe, die nuus en die skep vis is so gemeng dat dit nie eintlik veel
saak gaan maak hoeveel "samples" jy gaan trek nie, dit gaan gemeng bly!
Gevolglik hardloop ons amper tot by die grens, net so duskant Port Nolloth,
draai om en jaag elke inham en baaitjie binne tot onder in Gansbaai in die hoop
die gespikkelde vissies by daai tyd een groot pappery sal wees. Dit alles en nog
meer kan die crew te wagte wees in hierdie uitgawe, waarvan die ou gunsteling
kolomme oor-loop van al die bloedwater op die dek, waaronder "Die ABC van skuite",
"nuwe kleurskemas, "gesinkte skuite", "nuwe skuite", "Die skuit-toilet update"
en die "verbouings update". Ons beloer ook Publieke Werke se nuwe
haweborde van naderby en bring hulde aan 'n legendariese skuitbouer. Dit en nog
vele meer net hier op die kanaal van trawlkampioene. Tot volgende keer, over!
|
KAAPSE SKUITE-UPDATE Die plaaslike tunapaal en stokvisvloot wat werksaam is vanuit die Kaapse dokke word tans in alle erns voorberei vir die opkomende 2025/2026 tuna en stokvis seisoen. Afgeneem hieronder blink talle skoon geverfde skuite vanwaar al wat 'n beskikbare skeepshelling tans beset word deur Kaapse skuite, tot sover as Sandy Point hawe. Afgeneem hieronder op 26 Augustus 2025 langs die Ooskaai is "Conquistador" weer skoon geverf nadat sy onlangs weer terug gekeer het huis toe na 'n besoek aan die Kalkbaai skeepshelling.  Afgeneem hieronder op 26 Augustus 2025 langs die Ooskaai blink "Sailfish" weer in 'n skoon laag verf nadat sy onlangs die Sandy Point skeepshelling besoek het.  Afgeneem hieronder op 26 Augustus 2025 langs die Ooskaai is "Blue Dolphin" weer by die huis nadat die skuit vroeër die oggend teen dagbreek in die Kaapse dokke gearriveer het na 'n besoek aan die Sandy Point skeepshelling.  Afgeneem hieronder op 26 Augustus 2025 langs die Collier jetty lê "South West Lapwing" met 'n skoon geverfde romp nadat sy onlangs die Sandy Point skeepshelling besoek het.  Afgeneem hieronder op 26 Augustus 2025 op die Ooskaai staan leë verfblikke, verfrollers en talle laaitjies afkomstig van die "South West Petrel" (in die agtergrond) namate die skuitverwers besig is om die skuit weer mooi te maak.  NUWE NAAMGESKRIFTE VIR "TINA" Afgeneem hieronder op 26 Augustus 2025 langs die Collier jetty pryk nuwe naamgeskrifte op "Tina" se agterstewes. "NUWE" NAAMGESKRIFTE  "OU" NAAMGESKRIFTE  NUWE FLEETONE SATNAV VIR "ABE SHAPIRO" Afgeneem hieronder op 26 Augustus 2025 langs die Collier jetty is 'n splinternuwe Fleetone satnav antenna nou staande gemaak bo-op "Abe Shapiro" se wielhuis.  "KENTUCKY" KRY NUWE WIELHUIS Afgeneem hieronder op 26 Augustus 2025 langs die Collier jetty is 'n kykie na "Kentucky" se nuwe dubbelwielhuis wat op die oog af mens baie herhinner aan "Groenveld II" en "Mercury" se ou dubbelwielhuise van destyds...  "ESTRELA DO MAR" SE AGTERMAS Afgeneem hieronder op 26 Augustus 2025 langs die Vismark kaai beloer ons "Estrela Do Mar" se agtermas van naderby. Met tegnologie wat oor die jare heen drasties verbeter het, het die gebruik van 'n agtermas op Suid-Afrikaanse skuite heeltemal oorbodig geraak, met die gevolg dat dit oor die jare heen feitlik uitgesterf het.  "WERKENDAM" OP DIE SLIP Afgeneem hieronder op 26 Augustus 2025 op die Kaai 4 skeepshelling word die tunpaalskuit "Werkendam" voorberei vir die nuwe seisoen.  "AQUILLA" KOM KAAP TOE Afgeneem hieronder op 26 Augustus 2025 op die Kaapse synchroniseerhyser staan die "Aquilla", afkomstig van Houtbaai. Die "Aquilla" het vir die eerste keer sedert 1992/93 'n draai kom maak in die Kaapse dokke vir 'n skoon laag verf en algemene instandhoudingswerk. "Aquilla" was destyds gebou gewees letterlik bo-op die sypaadjie langs Tafelbaai Boulevard op 'n oop stuk grond reg langs die klubhuis van die Royal Cape seiljagklub - 'n werkswyse wat vandag met al sy health & safety regulasies feitlik onmoontlik sal wees om herhaal te kan word...  KAAPSE SKUITE SINK BO-OOR MEKAAR Afgeneem hieronder op 26 Augustus 2025 langs Concentra Ooskaai het "Luderitz Star" ook uiteindelik (soos verwag) die stryd verloor en letterlik bo-oor die "Fiskorn" gesink. Dit is egter nie die eerste keer dat skuite op die wyse bo-oor mekaar sink nie. In Saldanhabaai met die sink van "Atlantic Pride II" langs die slipkaai het sy die "Namutoni" wat aan haar buitekant gelê het saam met haar afgetrek die ewigheid in...  Afgeneem hieronder op 26 Augustus 2025 en die rooi sirkel wys die plek uit waar "Luderitz Star" se naamborde eens gemonteer was op die skuit se agterstewes, vanwaar beide naamborde nou vertoon word in die Trawler Heritage se hall of fame soos te siene verder af op hierdie blad. Vandag is dit nog net die "Wilmag" wat nog behoue gebly het van die Concentra Ooskaai-vloot. Slegs 25 jaar gelede het hierdie kom nog vol skuite gelê, sommer so vier-vier, vyf-vyf en ses-ses langs mekaar het hulle gelê, daar was skaars genoeg plek vir almal gewees waaronder "Bevelyn", "Stormy Weather", "Karasberg", "Skipness", "Bosveld", "Maria-Louisa", noem maar op...en in ons leeftyd het hulle almal uitgesterf, weg, "gone"...maar hul name is in my wese ingraveer en bly aanhou maal in my kop... "Rosalyn-Joy", "Modern Maid", "Tiger Reef", "Anesta", "Newlands"; "Winburg", "Otterdam", "Kingklip", "Marina", "Swift"... En voor ons was daar weer 'n ander generasie vissermanne gewees wat in hulle tyd weer 'n ander generasie skuite geken het wat vir ons generasie vandag slegs name op papier is..."Benjamin L.Collett", "Kernwood", "Forget-me-Not"...  Ek's jammer "Luderitz Star", maar Trawler Heritage het gedoen wat gedoen kon word om iets van jou behoue te kon laat bly... |
|
"ATLANTIC BLESSING" SOEK NUWE TUISTE Die 52-voet kreefskuit "Atlantic Blessing" van Gansbaai is opsoek na 'n nuwe tuiste en word tans te koop aangebied vir R4.5 miljoen. Vir verdere besonderhede gebruik die soekwoord "Gansbaai built boat" op Marketplace.  |
|
TER NAGEDAGTENIS AAN OOM RODNEY MISPLON Daar het in ons midde op 17 Junie 2025 nog 'n groot boom geval, met die nuus dat die legendariese bootbouer oom Rodney Misplon op 94-jarige ouderdom oorlede is. Oom Rodney was in sy leeftyd betrokke gewees by die bou van 501 skuite wat insluit trawlbakkies, kreefskuite, pelagiese skuite, navorsingsbote, patrolliebote, hoëspoed sport tuna bote, vragbote, asook N.S.R.I reddingsbote, vanwaar hy werksaam was oor die jare heen by Misplon & Co., Louw & Halvorsen, Globe Engineering en Republic Marine Contractors. Trawler Heritage was gevra om tydens die roudiens 'n huldeblyk te doen namens die hele Suid-Afrikaanse visbedryf, en hiermee vertrou ek dat daar nie 'n enkele booteienaar of visserman is wat nie sal saamstem met die huldeblyk oorgedra deur Trawler Heritage soos aangedui hieronder. En hiermee groet Trawler Heritage nog 'n mentor in my lewe. Met my laaste besoek aan oom Rodney, stop hy 'n foto van "Walvis Pioneer" in my hand en groet my - "jy weet mos wat gedoen moet word, en hoe dit gedoen moet word"...  The smell of oak, meranti, exotic hard woods and the constant hammering of block hammers at the yard of Louw & Halvorsen is today just a distant memory. High quality wooden hulls, each one a piece of art created by skillful shipwrights - Rodney Misplon being one of the finest. Exposed to the elements on a daily basis whether sun, rain, wind and cold, it was an environment in which Rodney thrived in. In a world dominated by productivity, turn over, overheads and fancy composite materials, the contribution by shipwrights like Rodney himself to a modern society are seemingly forgotten. Today, almost 50 years after the last wooden vessel left the yard of Louw & Halvorsen, 76 vessels still sail the seas around Southern Africa, bringing in their catches, every day and every night - all of them created by Rodney. Through determination and skillful craftsmanship Rodney Misplon has left behind a legacy over many decades not known by many, as for the following examples. The protection of our borders: By building navy patrol vessels as well as fisheries patrol vessels. Sea Trade: By building supply vessels, providing supplies to large bulk carriers passing the Cape of Good Hope. Rodney's biggest contribution was towards the South African fishing industry - providing the industry with hundreds of fishing vessels of all sizes - representing the pride of many fishing communities around the coast. The fishermen put all their trust in the craftsmanship of Rodney to provide them with sturdy boats, strong enough to survive even the biggest Cape winter storm. Rodney's craftsmanship contributed to the wealth and prosperity of the fishing industry in many ways... Rodney has helped to pay the school and university fees of the fishermen's children. Rodney has helped the fishermen to buy homes, vehicles, food, clothing and even Christmas presents - The amount of cups of coffee, packets of cigarettes and glasses of brandy the fishermen consumed, only the heavens know... Rodney even made a contribution regarding food security to millions of South Africans. Milk for instance, people think that dairy comes from the farm, but in fact it comes from the sea. The dairy farmers are dependant on the fishermen to catch fish, which is then converted into fish meal, an important source of protein for the cattle. Every time you pour milk into your coffee, chances are good that the cow was fed fish meal, caught by a boat, build and maintained by Rodney himself. Driving past a KFC, you don't smell chicken, you smell fish meal! So next time you enjoy your Streetwise Two meal, chances are good that the chicken was fed fish meal, caught by a boat build and maintained by Rodney himself. I am going to leave you with one last story. I once came across a Misplon boat standing on dry ground at the Cape Docks with graffiti written on it's lower hull, apparently written by a guy called "Pinocchio" - maybe he also had a long nose, I don't know, but what was written was a true reflection of Rodney Misplon's life: "When boats were wood, and men were men". |
|
MAURITANIE
PELAGIESE VISEKSPEDISIE 56ste HERDENKING 19 Augustus - 6 Desember 1969 Dis weer daardie tyd van die jaar wanneer ons terugdink aan 56 jaar gelede toe talle van ons oupa's, pa's en ooms vertrek het vanuit Sandy Point hawe na die onbekende waters van Mauritanië in 'n poging om 'n beter heenkome te bewerkstellig het vir die "Suiderkruis" pelagiese fabriekskip, ten einde die pelagiese bronne om Suider-Afrika te kon beskerm.  On 19 August 1969 a fleet of wooden purse seiners under command of a breed of fishermen, of the likes we shall never see again, set sail from Sandy Point Harbour destined for the unknown fishing grounds of Mauritania. Accompanied by the "Suiderkruis" factory ship, they had to leave in order to protect our pelagic resources. |
|
TRAWLER HERITAGE HALL OF FAME IN WORDING Afgeneem hieronder is die eerste fase van die Trawler Heritage hall of fame waaraan daar tans gewerk word op Laaiplek. Hierdie is slegs 'n gedeelte van wat na alle waarskynlikheid die grootste versameling van skuitnaamborde is in Suid-Afrika. Elkeen van hierdie naamborde het 'n storie om te vertel - die skuit van herkoms selfs 'n groter storie. Voor hierdie muur ruk iets in jou binneste jou tot stilstand, en dit is maar nog net die begin van die Trawler Heritage hall of fame...  |
|
DIE ABC VAN SKUITE Dis weer tyd om om nuwe naamgeskrifte van naderby te bekyk waaronder "Predator", "Tigerfish", "Gregory Justin", "Swordfish" en "Odyssey". Afgeneem hieronder op 17 Maart 2025 in die Kaapse dokke pryk nuwe viniel naamgeskrifte op die whaleback van die tunapaalskuit "Predator".  Geneem vanuit die Trawler Heritage argief is hoe "Predator" se naamgeskrifte voorheen daarna uitgesien het.  Afgeneem hieronder op 27 Julie 2025 op die Keyway Shipwright skeepshelling in Laaiplek vertoon "Gregory Justin" weer tradisionele houtnaamborde soos aangetoon met die rooi sirkel, en kom ons wees nou baie eerlik met mekaar, maar dit lyk strate beter as die vorige poging wat aangewend was...  Geneem vanuit die Trawler Heritage argief is hoe "Gregory Justin" se naamgeskrifte voorheen daarna uitgesien het - mens doen nie 'n kaliber skuit soos "Gregory Justin" die onreg aan met sulke verflenterde naamgeskrifte nie...  Afgeneem hieronder op 2 Augustus 2025 in Houtbaai vertoon "Tigerfish" nie net die skuit se naam en area kode nie, maar sommer ook die visvangkode, roepletters sowel as die port of registry- hulle wil seker maar net seker maak al die gegewens is sigbaar?  Afgeneem hieronder op 2 Augustus 2025 in Houtbaai vertoon "Swordfish" nou vir die eerste keer ooit haar naam sowel as 'n embleem van 'n swaardvis op die wielhuis se vooraansig - netjies!  Afgeneem hieronder op 20 Julie 2025 by Suid-Oranje ly "Odyssey" aan die een of ander vorm van dubbelvisie, terwyl die skuitverwers ook 'n veel beter poging kon aanwend het om die areakode netjies en univorm te laat vertoon het.  Nou kyk mense, by die tyd weet ons almal dat die skuitverwers 'n spesie op hul eie is. Afgeneem hieronder op 1 Julie 2025 in die Kaapse dokke staan en kyk die een skuitverwer vir die ander een hoe hy die awning se onderdak verf...gedog dis dalk 'n toesighouer, maar blykbaar toe nie...  Afgeneem hieronder en beide skuitverwers is nou in aksie met 'n verfroller in die hand, besig om die awning se onderdak te verf...dit terwyl 'n derde skuitverwer nou naderstaan om te kyk hoe die ander twee hul taak verrig...  |
|
NUWE KLEURSKEMAS Afgeneem hieronder op 1 Julie 2025 langs die Ooskaai in die Kaapse dokke vertoon "Chris Trautman" nog meer anti-fouling verf op haar romp soos aangetoon met die rooi sirkel. "NUWE" KLEURSKEMA  Wie weet, teen hierdie tempo mag die hele romp dalk teen volgende jaar met anti-fouling verf bedek wees?... Geneem vanuit die Trawler Heritage argief is hoe "Chris Trautman" se romp kleurskema voorheen daarna uitgesien het met veel minder anti-fouling verf op die romp. "OU" KLEURSKEMA  Afgeneem hieronder op 2 Augustus 2025 langs die Yskaai in Houtbaai is "Herman S" nou te siene in 'n nuwe groen kleurskema, vanwaar die skuit voorheen 'n grys kleurskema vertoon het. "NUWE" KLEURSKEMA  Geneem vanuit die Trawler Heritage argief is "Herman S" nog te siene in haar vorige grys kleurskema. "OU" KLEURSKEMA  Afgeneem hieronder op 2 Augustus 2025 langs Jetty No.3 in Houtbaai is "Langeberg" nou te siene in 'n baie eienaardige lig-groen kleurskema, vanwaar die skuit voorheen 'n blou kleurskema gehad het. "NUWE" KLEURSKEMA  Geneem vanuit die Trawler Heritage argief is "Langeberg" nog te siene in haar vorige blou kleurskema. "OU" KLEURSKEMA  'n Skuit se waterlyn is immers nooit waterpas nie, maar aai ouens, dit kos mos net 'n rolletjie masking tape om daai waterlyn veel mooier te kon laat vertoon het of hoe? Aai bliksem, die skuitverwers darem...  Afgeneem hieronder op 8 Augustus 2025 langs die Sea Harvest jetty in Saldanhabaai is "Harvest Cap Nord" te siene in 'n nuwe blou-en-room kleurskema, nadat die skuit onlangs nuut oor geverf was in die Robinson droogdok. "NUWE" KLEURSKEMA  Geneem vanuit die Trawler Heritage argief is "Harvest Cap Nord" nog te siene in haar vorige rooi-en-room kleurskema. "OU" KLEURSKEMA  Afgeneem hieronder op 8 Augustus 2025 slegs oomblikke nadat "Harvest Selina" die Saldanhabaai skeepshelling verlaat het kompleet met 'n Sea Harvet logo op die romp, nuut ontwerpte roepletters asook 'n nuwe blou-en-room kleurskema. "NUWE" KLEURSKEMA  Geneem vanuit die Trawler Heritage argief is "Harvest Selina" nog te siene in haar vorige blou-en-wit kleurskema en sonder die Sea Harvest logo. "OU" KLEURSKEMA  Afgeneem hieronder op 11 Augustus 2025 op die Gansbaai skeepshelling vertoon die stokvistreiler "Leeukop" ook nou 'n nuwe navy-blou kleurskema tesame met 'n wit streep op die deklyn. Voorheen het die "Leeukop" 'n konings-blou kleurskema vertoon. "NUWE" KLEURSKEMA  "OU" KLEURSKEMA  |
|
"BOETIE BERT" WORD GESTREEP Afgeneem hieronder op 20 Julie 2025 langs die Regeringskaai in Sandy Point hawe vertoon die stokvistreiler "Boetie Bert" nou 'n nuwe blou streep op haar awning soos aangetoon met die rooi sirkel. Voorheen het "Boetie Bert" se awning slegs uit 'n oranje kleurskema bestaan. "NUWE" AWNING KLEURSKEMA  Geneem vanuit die Trawler Heritage argief hieronder is "Boetie Bert" nog te siene in haar vorige oranje geverfde awning. "OU" AWNING KLEURSKEMA  |
|
NUUTSTE TOEVOEGING TOT STOKVISVLOOT GOOD-LUCK "HARVEST CAMISSA"!
Afgeneem hieronder op 1 Julie 2025 langs
South Arm in die Kaapse dokke is die 147-voet "Harvest
Camissa", die nuutste toevoeging tot die Suid-Afrikaanse
stokvisvloot. Die "Harvest Camissa" sal deel vorm van die Viking
Fishing vloot en is aangekoop vanaf Marin in Spanje. |
|
NUUTSTE TOEVOEGING TOT DIE HOUTBAAI VLOOT GOOD-LUCK "BOLOKO 2"!
Mooi was nog nooit
lelik nie, maar mens moet erken dat die "Boloko 2" die koppe
gaan laat draai met hierdie rooi kleurskema. Afgeneem hieronder
op 28 Julie 2025 in Sandy Point hawe is die nuwe 76-voet
stokvislanglyn skuit "Boloko 2" te siene, vanwaar die finale
afrondingswerk nog voltooi moet word by die Tallie Marine
skeepswerf. |
|
NUUTSTE TOEVOEGING TOT DIE HOUTBAAI VLOOT GOOD-LUCK "TIGHTLINE"!
Afgeneem hieronder op 16
April 2025 in Saldanhabaai is 47-voet "Tightline", die nuutste
tunapaalskuit wat te water gelaat is deur Sachal, en op 30 April
2025 tydens haar afleweringsvaart na Houtbaai vertrek het. |
|
NUUTSTE TOEVOEGING TOT DIE HOUTBAAI TUNA VLOOT IN WORDING
Afgeneem hieronder op 2
Augustus 2025 by die C-Craft skeepswerf in Houtbaai staan die
jongste bousel se wielhuis alreeds buitekant gereed vir
montering, vir wanneer die romp uit die mould gehaal gaan word. |
|
HOUTBAAI YSTORING WORD VERNUWE
Afgeneem hieronder op 2
Augustus 2025 is een van Houtbaai hawe se kenmerkende landmerke
wat tans 'n nuwe baadjie aangetrek word. Die ystoring wat
terugdateer vanuit 1964 in die dae van Table Top fishing word
tans geheel en al vernuwe ten einde noodsaaklike ys aan die
groeiende stokvisvloot te kan lewer wat opereer vanuit die hawe. |
|
NUUTSTE TOEVOEGING TOT DIE HOUTBAAI TREILVLOOT GOOD-LUCK "OCEAN SPRAY"!
Afgeneem hieronder op 2
Augustus 2025 in Houtbaai is die nuutste toevoeging tot die
plaaslike stokvisvloot genaamd "Ocean Spray" wat voorheen
aangewend was as 'n garnaalsleeptreiler vanuit Durban. Die
"Ocean Spray" vertoon alreeds met trots haar nuwe Houtbaai
areakode naamlik "HTB 6", wat terug in dae trots vertoon was
deur die eertydse tunapaalskuit genaamd "Excelsior".
|
|
"UMZABALAZO" TREF 'n DRYWENDE ROTS Afgeneem hieronder op 16 Junie 2025 in Kaapse hawe hel die stokvistreiler "Umzabalazo" oor na stuurboord nadat die skuit na alle waarskynlikheid 'n "drywende rots" getref het. Per definisie word 'n "drywende rots" soos volg gedefinieer: Wanneer die skipper sweer dat daardie klip/paal/onderwater obstruksie wat hy raak gery het, nie daar was die vorige keer toe hy daar verby gegaan het nie...Goeie nuus is egter dat alle skade opgedoen alreeds herstel is, en dat die skuit weer terug in die see is.  |
|
DIE SINK EN OPBREEK UPATE "MARQUERITE" SPOEL OP DIE WAL UIT Afgeneem hieronder op 30 Junie 2025 lê die diamantskuit "Marquerite" hoog en droog op die wal uitgespoel op Hondeklipbaai se strand nadat die skuit tydens 'n verbygaande winterstorm van haar mooring in die baai los gebreek het.  "ALBATROS" SINK IN PORT NOLLOTH Afgeneem hieronder tydens beter dae is hoe die diamantskuit "Albatros" van Port Nolloth daarna uitgesien het. Die "Albatros" is die jongste slagoffer van die veraadelike Port Nolloth hawe wat oor dekades heen al tientalle bote van die Port Nolloth vloot vernietig het.  Afgeneem op 1 Julie 2025 in Port Nolloth toon die rooi sirkel die skade opgedoen aan die diamantskuit "Azania", na vermoede was die "Albatros" en die "Azania" in 'n botsing betrokke nadat die "Albatros" se mooring ketting die gees gegee het, waarna die "Albatros" die stryd verloor en gesink het.  "HANGBERG" SINK IN HOUTBAAI In die vorige opdatering in die skuite-verjaar kolom het Trawler Heritage die volgende opmerking geskryf aangaande die "Hangberg": "Dis nie dat "Hangberg" nog enigsins aktief deelneem aan visvangbedrywighede nie. Sy lê nogtans in Houtbaai hawe en word geokkupeer deur 'n groep "hippies", seker ook maar net totdat 'n naat oop trek en die skuit langs die kaai gaan sink..." Afgeneem op 2 Augustus 2025 in Houtbaai, en soos korrek voorspel deur Trawler Heritage het "Hangberg" ook nou die stryd gewonne gegee, vanwaar sy langs die Noordekaai gesink lê. Gedurende die vroee 2000's was "Hangberg" nog een van Hermanus se spogskuite gewees, waarna sy weer na Houtbaai verhuis het. Nadat die De Stadler familie haar verkoop het was daar sprake dat die skuit in 'n "backpackers" omskep sou word, maar daardie tipe van drome het nog nooit pos gevat in Suid-Afrika nie, gegewe die paadjies wat "Groenveld II" asook "Drakenskop" moes geloop het.  "MARTIN J" Lê VERWOES IN HOUTBAAI Afgeneem op 2 Augustus 2025 voor die Houtbaai skeepshelling lê die laaste oorblyfsels van "Martin J" se bilges en kiel nadat die skuit letterlik stuk-vir-stuk opgekap en weg gedra is vir brandhout. En dis nou maar hoe dinge deesdae op Houtbaai gedoen word...skandelik om die minste te sê.  Afgeneem op 2 Augustus 2025 aan die anderkant van Houtbaai se hawe dryf "Martin J" se dek rond tussen "Merlene" en "Edelweiss". Hoe op dees aarde die dek hierso kon opeindig sal nugter alleen weet?  Afgeneem op 2 Augustus 2025 lyk hierdie kaai in Houtbaai meer soos tonele uit 'n burger-oorlog vanwaar wrakstukke afkomstig van "Khoe-Rasi", "Rooiberg" en "Martin J" die wêreld vol lê.   "FISKORN" SINK IN KAAPSE HAWE Afgeneem op 1 Julie 2025 langs Concentra Ooskaai in die Kaapse dokke lê die gesinkte romp van die voormalige tunapaalskuit "Fiskorn". Net langs die "Fiskorn" lê en wag die "Luderitz Star" ook vir die finale doodskoot, tot tyd en wyl daar besluit word om die skuite finaal te verwyder. "FISKORN"  "LUDERITZ STAR"  "STORMKOP" SE STACKER VERDWYN Afgeneem op 28 Julie 2025 op Laaiplek toon die rooi sirkel aan dat nie net "Stormkop" se stacker, maar ook gedeeltes van die aerial stand verwyder is van die skuit af. Of "Stormkop" ooit weer op die see gaan kom, begin by die dag al skraler te lyk...aai dammit.  Die treurmare op Laaiplek kry net nie einde nie. Afgeneem op 28 Julie 2025 op Laaiplek lê "Nossob" nog gekoppel aan 'n "lewens apparaat", met 'n waterpomp wat onverpoos water uit die romp pomp. Op hede is alle navigasie toerusting bo-op die wielhuis verwyder, tesame met die voorste maspaal, winch, sowel as gedeeltes van die shelter deck op portside.  Afgeneem op 2 Augustus 2025 op die Houtbaai skeepshelling herhinner hierdie oop gekraakte boeg mens aan die huidige kondisie van "Nossob", maar in hierdie geval is dit eerder die voormalige Franse vistreiler "Bolero" wat ook intussen die stryd verloor het met die aarde se gravitasiekragte wat die skuit se romp in flardes getrek het. 'n Houtskuit word immers nie gebou om op droeë grond te staan nie, 'n houtskuit word gebou om in die see te kan dryf!  Afgeneem hieronder is daar feitlik niks wat mens meer vir hierdie skuit kan doen nie, die hele romp met kiel en al het in twee gesplit.  EN NOU "KHOE-RASI" ? Afgeneem op 2 Augustus 2025 langs die slipkaai in Houtbaai vertoef die kaal gestroopte romp van die "Khoe-Rasi", vanwaar die skuit vroeër vanjaar langs die "Emerald Isle" gesink het, weer vlot gemaak is en nou langs die kaai lê en vertoef. Dalk Houtbaai se volgende wrak? Net tyd sal leer of die Houtbaaiers haar enige genade sal betoon.  Afgeneem hieronder op 10 Julie 2025 op die Saldanhabaai skeepshelling lê die gesloopte romp van die voormalige tunapaalskuit "Vlaeberg" in afwagting om die ewigheid in gestuur te word...  Afgeneem hieronder op 1 Junie 2025 op die Saldanhabaai skeepshelling is dit wat nog oor is van die voormalige langlyn skuit genaamd "Viola".  Afgeneem hieronder op 28 Julie 2025 in Sandy Point lê die omgekeerde voordek van die voormalige sardyn skuit genaamd "Anna" op die kaai, dit nadat die gesinkte skuit se romp gedurende die winterstorms gedisintegreer het.  Afgeneem hieronder op 2 Augustus 2025 in Houtbaai, en die half-gesinkte romp van "Marcon" dien vir oulaas nog 'n doel, vanwaar haweloses hulself tuis gemaak het binne-in die skuit se galley/meshroom area...wel, dit wat nog staande is van die skuit se wielhuis.  Afgeneem hieronder op 2 Augustus 2025 in Houtbaai en dis net kaal elektriese bedrading waar mens kyk, vanwaar hierdie kragvoorsieningspunt met omhulsel en al vernietig en weg gedra is...  Mense, naas kuile wat bol van die vis, kry mens nie 'n veel mooier gesig as dit wat hieronder uitgebeeld word nie. Ons sluit hierdie uiters treurige kolom genaamd "Die sink en opbreek update" af met 'n brokkie goeie nuus van 'n staalromp seiljag wat tans gesloop word op die Houtbaai skeepshelling...hip-hip hooray! Nog 'n hip-hip, daarsy!  |
| DIE SKUITE HOU
VERJAARSDAG! Gedurende Augustus-maand vier ons die verjaarsdae van 19 skuite wat op die oog-af dalk meer lyk soos 'n Tallie Marine partytjie. Soos gewoonlik dink Trawler Heritage ook terug aan 'n paar gedugte skuite van weleer wat ook hul verjaarsdae tydens Augustus-maand gevier het by name "Oceana Akwarius", "Brakenveld", "Oceana Berg", "Mandi", "Petrie Hein", "John Barbery", "Oom Joos" en "Etosha". (Die skuite se onderskeie ouderdomme word hieronder aangetoon in hakies.) Grey Ghost (3)  Restless Wave (4) 
Annabelle Rose (5) 
Renja (5) |
